نئی دہلی: سپریم کورٹ نے جمعرات کو 6:3 کی اکثریت سے فیصلہ دیا کہ 1978 کے اپنے فیصلے میں دی گئی مزدوروں کے حق میں ’انڈسٹری‘ کی وسیع تعریف کو صنعتی تعلقات کوڈ، 2020 کی تشریح کے لیے استعمال نہیں کیا جائے گا۔ چیف جسٹس سوریہ کانت کی سربراہی میں نو رکنی آئینی بنچ نے اکثریتی فیصلے میں یہ بھی قرار دیا کہ ’انڈسٹری‘ کی تعریف سے متعلق 1978 کے سات رکنی بنچ کے فیصلے پر نظرثانی کی درخواست کو نو رکنی بنچ کے سامنے بھیجنا قانونی طور پر درست تھا۔ 21 فروری 1978 کو سپریم کورٹ کے سات رکنی بنچ نے بنگلور واٹر سپلائی اینڈ سیوریج بورڈ کے معاملے میں ’انڈسٹری‘ کی تعریف کو وسیع کیا تھا۔

اس کے نتیجے میں اسپتالوں، تعلیمی اداروں، کلبوں اور سرکاری فلاحی محکموں سمیت متعدد شعبوں کے لاکھوں ملازمین کو صنعتی تنازعات ایکٹ، 1947 کے تحت قانونی تحفظ حاصل ہوا تھا۔ چیف جسٹس نے اپنے اور جسٹس ستیش چندر شرما، جسٹس آلوک آرادھے اور جسٹس وپل ایم پنچولی کی جانب سے اکثریتی فیصلہ سناتے ہوئے واضح کیا کہ 1978 کے فیصلے میں وضع کیا گیا ’ٹرپل ٹیسٹ‘ برقرار رہے گا۔ تاہم یہ ’ٹرپل ٹیسٹ‘ اب منسوخ کیے جا چکے 1947 کے صنعتی تنازعات ایکٹ کے تحت زیر التوا مزدوروں سے متعلق مقدمات میں ہی لاگو ہوگا۔

جسٹس پی ایس نرسمہا اور جسٹس جوی مالیا باگچی نے الگ الگ فیصلے تحریر کیے اور مجموعی طور پر چیف جسٹس کے اکثریتی فیصلے سے اتفاق کیا۔ دونوں ججوں نے قرار دیا کہ 1978 کے فیصلے میں ’انڈسٹری‘ کی تعریف پر نظرثانی کے لیے معاملہ نو رکنی بنچ کو بھیجنا درست تھا۔ جسٹس بی وی ناگراتھنا، جسٹس دیپانکر دتا اور جسٹس اجول بھویان نے اکثریتی فیصلے سے اختلاف کیا، خاص طور پر نو رکنی بنچ کو بھیجے گئے معاملے کی قابلِ سماعت حیثیت کے سوال پر۔ 1978 کے فیصلے میں جسٹس وی آر کرشنا ایئر کی جانب سے وضع کیے گئے ’ٹرپل ٹیسٹ‘ کے مطابق، ایسی منظم سرگرمی جس میں اشیا یا خدمات کی پیداوار یا تقسیم کے لیے آجر اور ملازمین باہمی تعاون کرتے ہوں، عمومی طور پر ’انڈسٹری‘ کے زمرے میں آتی ہے۔

اس کے باعث مختلف شعبوں کے کارکنوں کو قانونی مزدور تحفظ حاصل ہوا تھا۔ اکثریتی فیصلے میں یہ بھی واضح کیا گیا کہ 1978 کا فیصلہ 2020 کے صنعتی تعلقات کوڈ پر لاگو نہیں ہوگا۔ نئے قانون کے تحت دائر ہونے والے ہر نئے مقدمے کا فیصلہ اس کے مخصوص حقائق اور حالات کی بنیاد پر کیا جائے گا۔ جسٹس ناگراتھنا نے اختلافی فیصلے میں کہا کہ 1978 کا فیصلہ درست تھا اور اسے نظرثانی کے لیے بھیجنے کی کوئی ضرورت نہیں تھی۔ تمام نو جج اس بات پر متفق تھے کہ چونکہ 1947 کا قانون اب منسوخ ہو چکا ہے اور اس کی جگہ نیا قانون نافذ ہو گیا ہے، اس لیے یہ معاملہ بڑی حد تک نظری اور علمی نوعیت اختیار کر چکا ہے۔

چیف جسٹس نے کہا، ’’اکثریت نے قرار دیا ہے کہ ریفرنس درست ہے اور ہم نے واضح کر دیا ہے کہ اکثریتی فیصلہ مستقبل کے لیے نافذ ہوگا۔ 1947 کے صنعتی تنازعات ایکٹ کے تحت زیر التوا معاملات کا فیصلہ بنگلور واٹر سپلائی کے 1978 کے فیصلے میں دی گئی ’ٹرپل ٹیسٹ‘ کی تعریف کے مطابق کیا جائے گا۔‘‘ انہوں نے مزید کہا کہ 1978 کے فیصلے میں وضع کیے گئے اصولوں کو ’’2020 کے ایکٹ کی تشریح کے لیے وسیع پیمانے پر بنیادی اصول‘‘ نہیں سمجھا جائے گا اور 2020 کے قانون کی تشریح آزادانہ طور پر کی جائے گی۔ تفصیلی فیصلے بعد میں جاری کیے جائیں گے۔

یہ فیصلہ مزدوروں اور صنعتی شعبے میں خاص اہمیت کا حامل ہے، کیونکہ اس کے اثرات کارکنوں کے حقوق اور 1947 کے قانون کے تحت انہیں حاصل مزدور تحفظات پر پڑ سکتے ہیں۔ 16 فروری کو سپریم کورٹ نے نو رکنی بنچ کے سامنے زیر غور اہم سوالات طے کیے تھے، جن میں یہ بھی شامل تھا کہ 1978 کے بنگلور واٹر سپلائی کیس میں جسٹس وی آر کرشنا ایئر کی جانب سے ’انڈسٹری‘ کا تعین کرنے کے لیے وضع کیا گیا ٹیسٹ درست قانون ہے یا نہیں۔

عدالت نے یہ سوال بھی اٹھایا تھا کہ صنعتی تنازعات ترمیمی ایکٹ، 1982 اور صنعتی تعلقات کوڈ، 2020 کا 1947 کے قانون میں ’انڈسٹری‘ کی اصطلاح کی تشریح پر کیا قانونی اثر پڑتا ہے۔ اس کے علاوہ نو رکنی بنچ کو یہ بھی طے کرنا تھا کہ سرکاری محکموں یا ان کے اداروں کی جانب سے چلائی جانے والی سماجی بہبود کی سرگرمیوں، اسکیموں یا دیگر منصوبوں کو صنعتی تنازعات ایکٹ کی دفعہ 2(j) کے تحت ’’صنعتی سرگرمیاں‘‘ قرار دیا جا سکتا ہے یا نہیں۔