نئی دہلی [ہندوستان]: سپریم کورٹ نے ہمالیائی خطے کی ریاستوں میں ماحولیاتی توازن بگڑنے پر تشویش ظاہر کرتے ہوئے کہا ہے کہ یہ خطہ ’’سنگین وجودی بحران‘‘ کا سامنا کر رہا ہے اور ہماچل پردیش حکومت سے کئی اہم سوالات پوچھے ہیں۔ جسٹس وکرم ناتھ اور جسٹس سندیپ مہتا کی بنچ نے کہا کہ سیلاب اور لینڈ سلائڈنگ میں بے شمار لوگ اپنی جان گنوا بیٹھے ہیں اور ہزاروں مکانات تباہ ہوئے ہیں۔

عدالت نے کہا: ’’اس مانسون میں غیر معمولی بارش نے ہماچل پردیش کے نازک ماحولیاتی نظام کو تباہی کے دہانے پر پہنچا دیا ہے۔ مختلف علاقوں میں آنے والی بارش اور لینڈ سلائڈنگ نے زندگی اور جائیداد کو شدید نقصان پہنچایا ہے۔ بے شمار مکانات، پختہ عمارتیں اور عارضی ڈھانچے تباہ کن لینڈ سلائڈنگ کی نذر ہو گئے ہیں۔‘‘

سپریم کورٹ نے کہا کہ ہماچل پردیش سمیت پورا ہمالیائی خطہ ایک سنگین وجودی خطرے سے دوچار ہے۔ عدالت نے ریاستی حکومت سے تفصیلات طلب کی ہیں، جن میں موسمیاتی تبدیلی، شجرکاری، ہائی ویز، فور لین سڑکیں، پن بجلی منصوبے، کان کنی، آفات سے نمٹنے کے منصوبے، سیاحت کی پالیسی اور کاٹے گئے درختوں کی تعداد شامل ہیں۔

عدالت نے ریاست کے محکمہ جنگلات کے پرنسپل سکریٹری کو ہدایت دی کہ 28 اکتوبر تک حلف نامہ داخل کریں۔ بنچ نے کہا کہ یہ انسان ہیں، قدرت نہیں، جو لگاتار لینڈ سلائڈنگ، مکانات اور سڑکوں کے دھنسنے وغیرہ کے ذمہ دار ہیں۔ مختلف ماہرین اور رپورٹس نے یہ واضح کیا ہے کہ اس تباہی کی بڑی وجوہات پن بجلی منصوبے، فور لین سڑکیں، جنگلات کی کٹائی اور کثیر منزلہ عمارتیں ہیں۔

سپریم کورٹ نے ریاست میں کل جنگلاتی رقبے، گذشتہ دو دہائیوں میں غیر جنگلاتی استعمال کے لئے منتقل کیے گئے رقبے، اور درختوں و جنگلات کے احاطے میں ہونے والی تبدیلیوں کی تفصیلات مانگی ہیں۔ عدالت نے پچھلے دس برسوں میں 500 یا اس سے زیادہ درخت کاٹنے کی دی گئی اجازتوں، غیر قانونی کٹائی کے مقدمات اور ان کی موجودہ صورت حال کی تفصیلات بھی طلب کی ہیں۔ ساتھ ہی، گذشتہ 20 برسوں میں حکومت اور سرکاری اداروں یا نجی کمپنیوں کی جانب سے کیے گئے متبادل شجرکاری کے اعداد و شمار بھی پیش کرنے کو کہا ہے۔

مزید یہ بھی پوچھا گیا کہ آیا ریاست میں زوننگ (زلزلی خطے، لینڈ سلائڈنگ، سبز علاقوں یا ماحولیاتی حساسیت کی بنیاد پر) کی گئی ہے؟ کیا ریاست کے پاس ایسی ماحولیاتی جگہیں ہیں جہاں صنعتی منصوبوں یا بڑے پروجیکٹس پر پابندی ہے؟ عدالت نے یہ بھی پوچھا کہ کیا ریاست کے پاس موسمیاتی تبدیلی کی کوئی پالیسی ہے اور اگر ہے تو اس کے تحت کون سے اقدامات کیے گئے ہیں تاکہ قبل از وقت تباہی سے بچا جا سکے؟

ریاست کے ڈیزاسٹر مینجمنٹ پلان، ان پر عمل درآمد، اور پچھلے 20 برس میں مختص اور خرچ کیے گئے فنڈز کی تفصیلات بھی طلب کی گئی ہیں۔ سپریم کورٹ نے ریاستی و قومی شاہراہوں کی تفصیلات، فور لین سڑکوں کی تعداد، زیر تعمیر سڑکوں کی صورت حال، درختوں کی کٹائی اور دھماکہ خیز مواد کے استعمال کے اجازت ناموں کی تفصیلات بھی طلب کی ہیں۔

عدالت نے ریاست کی ندیوں کی تعداد، ہر ندی پر بنے پن بجلی منصوبوں، ان کے آغاز کی تاریخ، کان کنی کے لائسنسز (موجودہ اور زیر غور) کی تفصیلات، ہوٹلوں، صنعتوں اور کرایے پر دی جانے والی رہائشوں کی معلومات بھی طلب کی ہیں۔ مزید یہ بھی کہا گیا کہ ریاست کو سیاحتی سرگرمیوں کو کنٹرول کرنے کے لیے خاص طور پر مانسون سیزن میں کیا اقدامات کیے گئے ہیں اور سیاحوں کے دباؤ کو ماحولیاتی حالات کے ساتھ کس طرح متوازن کیا جا رہا ہے۔

یاد رہے کہ 28 جولائی کو جسٹس جے بی پردیوالا اور جسٹس آر مہادیون کی ایک اور بنچ نے کہا تھا کہ اگر حالات نہ بدلے تو ’’ہماچل پردیش ہوا میں غائب ہو سکتا ہے‘‘۔ اس وقت عدالت نے خود نوٹس لیتے ہوئے کہا تھا کہ ریاست میں موسمیاتی تبدیلیوں کا اثر ’’واضح اور تشویشناک‘‘ ہے۔ ماہرین اور رپورٹس کے مطابق ریاست میں تباہی کی بڑی وجوہات پن بجلی کے منصوبے، فور لین سڑکیں، جنگلات کی کٹائی اور کثیر منزلہ عمارتیں ہیں۔

عدالت نے یہ بھی کہا کہ اگرچہ سیاحت ریاست کی بڑی آمدنی کا ذریعہ ہے، لیکن بے قابو سیاحت نے ماحول پر شدید دباؤ ڈال دیا ہے۔ سپریم کورٹ نے مرکز کو بھی متوجہ کیا کہ اس بات کی ذمہ داری صرف ریاست کی نہیں بلکہ مرکز کی بھی ہے کہ ماحولیاتی توازن مزید خراب نہ ہو اور قدرتی آفات کو روکا جا سکے۔