آواز دی وائس، ممبئی

صحافی اشوک پانڈے پرحملہ کرنے کے الزام میں بالی ووڈ کے معروف اداکار سلمان خان اور ان کے باڈی گارڈ کے خلاف ممبئی کی ایک عدالت نے سمن جاری کیا ہے۔

ایسا لگ رہا کہ اب سلمان خان کے لیے قانونی پریشانی جلد ختم ہوتی نظر نہیں آ رہی۔ اداکارسلمان خان کو اندھیری مجسٹریٹ کورٹ نے اپنے باڈی گارڈ کے ساتھ صحافی کے ساتھ مبینہ طور پر حملہ کرنے کے الزام میں طلب کیا ہے۔

خیال رہے کہ یہ معاملہ سنہ 2019 کا ہے، جب صحافی اشوک پانڈے نے بالی ووڈ سپر اسٹار کے خلاف مقدمہ درج کرایا تھا۔ اشوک پانڈے نے دعویٰ کیا تھا کہ انہوں نے سلمان خان کے باڈی گارڈ سے اجازت لینے کے بعد ان کی تصاویر لینے کی کوشش تھی؛ جب کہ وہ ممبئی کی ایک سڑک پر سائیکل چلا رہے تھے۔

کورٹ سے جاری سمن کی کاپی

اشوک پانڈے نے الزام لگایا ہے کہ سلمان خان اس پر برہم ہوگئے اور انہوں نے اپنے باڈی گارڈ سے انہیں مارنے کے لیے کہا۔اشوک پانڈے نے مزید دعویٰ کیا ہے کہ ان کا فون چھین لیا گیا اور انہیں دھمکیاں بھی دی گئی۔

جب اشوک پانڈے پولس کے پاس پہنچے تو انہوں نے مبینہ طور پر اس کی شکایت کو یہ کہتے ہوئے نمٹا دیا کہ یہ کوئی جرم نہیں ہوا۔ اس کے بعد انہوں نے عدالت سے رجوع کیا۔ ذرائع کے مطابق سلمان خان پر آئی پی سی کی دفعہ 504 (امن کی خلاف ورزی پر اکسانا) اور 506 (مجرمانہ دھمکی) کے تحت مقدمہ درج کیا گیا ہے۔