آواز دی وائس، نئی دہلی

جنگ زدہ یوکرین کے شمال مشرقی شہر سومی سے نکالے گئے 600 ہندوستانی طلباء کا آخری بڑا گروپ پولینڈ پہنچ گیا ہے۔

طالب علم لویب سے پولینڈ جانے والی خصوصی ٹرین میں سوار ہوئے۔ امکان ہے کہ وہ جمعرات کو ہندوستان کے لیےروانہ ہوں گے۔

یہ طلباء پولٹاوا سے خصوصی ٹرین کے ذریعے مغربی یوکرین کے شہر لویب پہنچے تھے۔

میڈیکل کی ایک 25 سالہ طالبہ جسنا جیجی نے کہا کہ ہم پولینڈ پہنچ گئے ہیں، یہاں سے ہمارے ہندوستان جانے کا امکان ہے۔

یوکرین میں طلباء کو جنگ زدہ یورپی ملک سے نکالا جا رہا ہے، جو مختلف ذرائع نقل و حمل کا استعمال کرتے ہوئے سینکڑوں میل کا سفر طے کر رہے ہیں۔

حکومت ہند یوکرین میں پھنسے ہندوستانیوں کو بچانے کے لیے 'آپریشن گنگا' مہم چلا رہی ہے۔

سومی میں آپریشن منگل کی صبح اس وقت شروع ہوا جب 600 ہندوستانیوں کے آخری بڑے گروپ کو شہر سے نکالا گیا۔

ایک طالب علم کوآرڈینیٹر انشاد علی نے بتایا کہ انٹرنیشنل کمیٹی آف ریڈ کراس کی مدد سے ہندوستانی شہریوں کو 13 بسوں کے قافلے میں سومی سے لے جایا گیا۔

انہیں سومی سے نکالنے کی یہ دوسری کوشش تھی۔ سومی گزشتہ ماہ یوکرین پر روس کے حملے کے بعد سے شدید گولہ باری کی زد میں ہے۔