نئی دہلی

ہندوستانیہ جنتا پارٹی (بی جے پی) کی تمل ناڈو یونٹ کے سابق صدر کے۔ اَنّاملائی نے منگل کو کہا کہ 21 جون کو ہونے والی قومی اہلیت و داخلہ امتحان (نیٹ-یو جی) کی دوبارہ آزمائش کے لیے کیے گئے اعلیٰ سطحی، خفیہ اور فوجی طرز کے سکیورٹی انتظامات اور مصنوعی ذہانت پر مبنی چہرہ شناختی نظام (فیس ریکگنیشن) امیدواروں کے ذہنی دباؤ میں مزید اضافہ کریں گے

۔نیٹ کی دوبارہ آزمائش کے لیے امیدواروں پر نافذ کی جانے والی سخت حفاظتی تدابیر پر تشویش ظاہر کرتے ہوئے اَنّاملائی نے کہا، ’’حکومت نے سوالیہ پرچہ لیک ہونے سے روکنے کے لیے اقدامات تو کیے ہیں، لیکن وہ یہ بھول گئی ہے کہ اس سے طلبہ پر اضافی ذہنی دباؤ پڑ رہا ہے۔ یہ وہی طلبہ ہیں جنہوں نے اس امتحان کی تیاری میں کئی ماہ صرف کیے ہیں۔ ایسی صورتحال نہ صرف امتحانی نظام کے بنیادی مقصد کو کمزور کرتی ہے بلکہ قومی تعلیمی پالیسی (این ای پی) 2020 کے اُس ہدف کے بھی خلاف ہے جس کا مقصد امتحانی دباؤ کو کم کرنا ہے۔‘

حال ہی میں اپنی نئی سیاسی جماعت بنانے کے اعلان کے بعد مرکزی حکومت کے مؤقف پر تنقید کرتے ہوئے اَنّاملائی نے سوشل میڈیا پلیٹ فارم ایکس پر ایک پوسٹ میں لکھا  کہ دو سطحی سی آر پی ایف اور سی آئی ایس ایف کا حفاظتی حصار، اور ہندوستانی فضائیہ کی معاونت۔ مصنوعی ذہانت کی نگرانی کے ساتھ چار سطحی سی سی ٹی وی نظام۔ داخلے سے قبل بایومیٹرک اور چہرہ شناختی عمل۔ متعدد بار تلاشی۔ اور وزیرِ اعظم کے دفتر (پی ایم او) کی براہِ راست نگرانی میں کثیر سطحی معائنہ۔انہوں نے کہا کہ جی ہاں، آپ نے بالکل درست پڑھا۔ لیکن یہ کسی اعلیٰ درجے کے خفیہ فوجی نوعیت کے سافٹ ویئر کی خریداری کے انتظامات نہیں ہیں، بلکہ یہ سب انتظامات وزارتِ تعلیم نے 21 جون 2026 کو ہونے والی نیٹ کی دوبارہ آزمائش کے لیے کیے ہیں۔

اَنّاملائی نے کہا کہ اضافی حفاظتی اقدامات اور بہتر نگرانی کے ذریعے سوالیہ پرچہ لیک ہونے سے روکنے کی حکومتی کوششوں کو ہر طالب علم سراہتا ہے، لیکن امتحانی مرکز میں داخلے سے قبل جانچ کے دائرے میں توسیع، طویل تلاشی کے مراحل اور امتحان کے دورانیے کو 180 منٹ سے بڑھا کر 195 منٹ کرنا امیدواروں پر دباؤ کو مزید بڑھا دے گا۔انہوں نے یہ بھی کہا کہ ان تمام انتظامات کے باوجود طلبہ کو ایڈمٹ کارڈ ڈاؤن لوڈ کرنے میں مشکلات کا سامنا ہے۔ تاہم، قومی امتحانی ایجنسی (این ٹی اے) نے طلبہ کو یقین دلایا ہے کہ اس مسئلے کا جلد از جلد حل نکالا جائے گا۔