نئی دہلی 

لکھنؤ میں حال ہی میں پیش آنے والے ہولناک آتشزدگی کے واقعے کے بعد اتر پردیش حکومت نے حفاظتی معیارات کی خلاف ورزی کرنے والے کوچنگ اداروں کے خلاف ریاست گیر مہم تیز کر دی ہے۔ بدھ کے روز ریاستی دارالحکومت لکھنؤ سمیت کئی اضلاع میں خصوصی معائنہ مہم چلائی گئی، جس کے دوران متعدد اداروں کے خلاف کارروائی کی گئی۔

لکھنؤ کے علی گنج-کپور تھلا علاقے میں لکھنؤ ترقیاتی اتھارٹی (ایل ڈی اے)، محکمہ فائر بریگیڈ اور محکمہ بجلی کی مشترکہ ٹیم نے مختلف کوچنگ اداروں کا معائنہ کیا۔ جانچ کے دوران کئی اداروں میں حفاظتی معیارات سے متعلق سنگین خامیاں پائی گئیں۔ حکام نے کم از کم نصف درجن کوچنگ اداروں کو سیل کر دیا۔ اس کے ساتھ عمارتوں کے مالکان سے منظور شدہ نقشے اور دیگر ضروری دستاویزات بھی طلب کیے گئے۔ جن اداروں کے پاس مطلوبہ ریکارڈ موجود نہیں تھا، انہیں نوٹس جاری کر دیے گئے۔

حکام نے تمام کوچنگ اداروں کے منتظمین کو ہدایت دی ہے کہ وہ آگ سے تحفظ کے انتظامات اور عمارت سازی کے قواعد و ضوابط پر مکمل عمل درآمد یقینی بنائیں۔ انہوں نے خبردار کیا کہ قواعد کی خلاف ورزی کرنے والوں کے خلاف آئندہ بھی سخت کارروائی جاری رہے گی۔

قابلِ ذکر ہے کہ منگل کے روز لکھنؤ میں پیش آنے والے آتشزدگی کے واقعے میں 15 افراد کی ہلاکت کے بعد ریاستی حکومت نے غیر قانونی کوچنگ اداروں اور حفاظتی معیارات کو نظر انداز کرنے والے مراکز کے خلاف خصوصی مہم شروع کی تھی۔

متھرا میں بھی انتظامیہ نے بڑی کارروائی کرتے ہوئے دو درجن سے زائد کوچنگ سینٹرز، لائبریریوں، ہوٹلوں اور گیسٹ ہاؤسز کو سیل کر دیا۔ ضلعی انتظامیہ کے مطابق کئی ادارے تہہ خانوں اور زیرِ زمین عمارتوں میں مناسب حفاظتی انتظامات کے بغیر چلائے جا رہے تھے۔ اسی طرح وِرنداون میں بھی 16 گیسٹ ہاؤسز کو قواعد کی خلاف ورزی کے باعث بند کر دیا گیا۔