حاملہ خواتین کی موت کے معاملے میں قصورواروں کے خلاف سخت کارروائی کی جائے: اشوک گہلوت
جے پور
راجستھان کے سابق وزیرِ اعلیٰ اشوک گہلوت نے ریاست میں زچگی کے بعد خواتین کی اموات اور متعدد خواتین کے شدید بیمار ہونے کے واقعات پر گہری تشویش کا اظہار کرتے ہوئے ذمہ دار افراد کے خلاف سخت کارروائی کا مطالبہ کیا ہے۔گہلوت نے اس معاملے پر وزیرِ اعلیٰ بھجن لال شرما کو ایک خط لکھا ہے، جس میں متاثرہ خاندانوں کو انصاف فراہم کرنے کا مطالبہ بھی کیا گیا ہے۔
ایک بیان کے مطابق، اشوک گہلوت نے کوٹا کے نیو میڈیکل کالج اسپتال اور بیکانیر کے پی بی ایم اسپتال میں زچگی کے بعد ماؤں کی اموات اور کئی خواتین کے گردے فیل ہونے کے نہایت سنگین اور افسوسناک واقعات پر گہری تشویش ظاہر کی ہے۔انہوں نے اس انتہائی حساس معاملے پر وزیرِ اعلیٰ بھجن لال شرما کو خط لکھ کر قصورواروں کے خلاف سخت کارروائی اور متاثرہ خاندانوں کو انصاف دلانے کا مطالبہ کیا۔
سابق وزیرِ اعلیٰ نے اپنے خط میں واضح طور پر کہا کہ یہ محض ایک عام حادثہ نہیں بلکہ سرکاری نظام کی "ادارہ جاتی ناکامی" کا نتیجہ ہے۔
انہوں نے مطالبہ کیا کہ معاملے کی تحقیقاتی رپورٹ فوری طور پر عوام کے سامنے لائی جائے، ذمہ دار افسران اور ڈاکٹروں کے خلاف فوجداری مقدمات درج کیے جائیں اور متاثرہ خواتین کے تاحیات علاج کی سرکاری ضمانت دی جائے۔
خط میں گہلوت نے لکھا کہ وہ کوٹا میں زیرِ علاج زچہ خواتین اور ان کے اہلِ خانہ سے ملاقات کر چکے ہیں۔انہوں نے کہا کہ وہاں جو منظر میں نے دیکھا، وہ دل دہلا دینے والا تھا۔ یہ سب انتہائی غریب خاندانوں کی بے بس خواتین ہیں، جو سرکاری نظام پر بھروسہ کرکے اسپتال آئی تھیں، لیکن ان کے اس اعتماد کے ساتھ نہایت ظالمانہ دھوکہ کیا گیا ہے۔
گہلوت نے اپنے خط میں امید ظاہر کی کہ وزیرِ اعلیٰ اس انتہائی حساس معاملے میں فوری اور سخت کارروائی کریں گے اور متاثرہ خاندانوں کو انصاف فراہم کریں گے۔
.webp "حاملہ خواتین کی موت کے معاملے میں قصورواروں کے خلاف سخت کارروائی کی جائے: اشوک گہلوت")
