ممبئی
اتار چڑھاؤ سے بھرے کاروباری دن کے دوران مقامی شیئر بازاروں میں جمعرات کو ابتدائی تیزی برقرار نہ رہ سکی اور دونوں اہم اشاریے خسارے میں بند ہوئے۔ بڑی کمپنیوں کے حصص میں منافع وصولی کے باعث بی ایس ای سینسیکس 135 پوائنٹس گر گیا، جبکہ این ایس ای نفٹی میں معمولی کمی دیکھی گئی۔30 حصص پر مشتمل بی ایس ای سینسیکس 135.03 پوائنٹس یعنی 0.18 فیصد کی کمی کے ساتھ 75,183.36 پوائنٹس پر بند ہوا۔ کاروبار کے دوران یہ ایک وقت میں 75,945.79 پوائنٹس کی بلند ترین سطح تک پہنچا، جبکہ نچلی سطح 74,996.78 پوائنٹس رہی۔ اس طرح دن بھر میں 949.01 پوائنٹس کا اتار چڑھاؤ ریکارڈ کیا گیا۔
دوسری جانب 50 حصص پر مشتمل این ایس ای نفٹی 4.30 پوائنٹس یعنی 0.02 فیصد کی معمولی کمی کے ساتھ 23,654.70 پوائنٹس پر بند ہوا۔سینسیکس میں شامل کمپنیوں میں بجاج فائنانس، ٹیک مہندرا، ہندوستان یونی لیور، انفوسس، بجاج فِن سرو اور بھارتی ایئرٹیل کے حصص نمایاں طور پر گراوٹ کا شکار رہے۔
جبکہ فائدے میں رہنے والے حصص میں انٹرگلوب ایوی ایشن، ٹرینٹ، بھارت الیکٹرانکس اور اڈانی پورٹس شامل رہے۔لائیولانگ ویلتھ کے بانی اور تحقیقی تجزیہ کار ہری پرساد کے نے کہا کہ ہندوستانی شیئر بازاروں میں دن بھر اتار چڑھاؤ دیکھنے میں آیا۔ عالمی سطح پر مثبت اشاروں کے باوجود معاشی صورتحال سے متعلق خدشات اور بلند سطحوں پر مضبوط مزاحمت کی وجہ سے اہم اشاریے اپنی ابتدائی مضبوط بڑھت برقرار نہ رکھ سکے۔
عالمی معیار کے خام تیل برینٹ کروڈ کی قیمت 0.71 فیصد کم ہو کر 104.3 ڈالر فی بیرل پر آ گئی۔ایشیا کے دیگر بازاروں میں جنوبی کوریا کا کوسپی اور جاپان کا نِکّی انڈیکس بڑھت کے ساتھ بند ہوئے، جبکہ چین کا شنگھائی کمپوزٹ اور ہانگ کانگ کا ہینگ سینگ انڈیکس گراوٹ کے ساتھ بند ہوئے۔
یورپ کی بڑی مارکیٹوں میں دوپہر کے کاروبار کے دوران تیزی کا رجحان دیکھا گیا، جبکہ امریکی بازار بدھ کے روز نمایاں اضافے کے ساتھ بند ہوئے تھے۔شیئر بازار کے اعداد و شمار کے مطابق، غیر ملکی ادارہ جاتی سرمایہ کاروں نے بدھ کو 1,597.35 کروڑ روپے مالیت کے حصص فروخت کیے۔
بدھ کے روز بی ایس ای سینسیکس 117.54 پوائنٹس کے اضافے کے ساتھ 75,318.39 پوائنٹس پر بند ہوا تھا، جبکہ نفٹی 41 پوائنٹس بڑھ کر 23,659 پوائنٹس تک پہنچ گیا تھا۔
