کھیلوں کے شعبے میں اٹھائے گئے اقدامات سے کھلاڑیوں کے لیے نئے مواقع پیدا ہو رہے ہیں: ٹھاکر
نئی دہلی
بھارتیہ جنتا پارٹی (بی جے پی) کے رہنما اور سابق مرکزی وزیرِ کھیل انوراگ ٹھاکر نے کہا ہے کہ "کھیلو انڈیا" جیسی پہل، کھیلوں کے بنیادی ڈھانچے میں توسیع اور بین الاقوامی سطح پر زیادہ مواقع فراہم کیے جانے سے ملک میں کھیلوں کا نظام تبدیل ہوا ہے اور نوجوان کھلاڑیوں کے لیے نئے مواقع پیدا ہوئے ہیں۔
ہمی پور سے رکن پارلیمنٹ انوراگ ٹھاکر منگل کی شام "بین الاقوامی اولمپک ہفتہ" کے موقع پر منعقدہ ایک آگاہی دوڑ سے خطاب کر رہے تھے۔ٹھاکر نے کہا کہ ایک صحت مند جسم ہی ایک صحت مند معاشرے اور مضبوط ملک کی بنیاد ہے۔ اگر ہم چاہتے ہیں کہ آنے والی نسل منشیات سے دور رہے اور نظم و ضبط، خود اعتمادی اور توانائی سے بھرپور ہو، تو کھیلوں اور باقاعدہ جسمانی سرگرمیوں کو روزمرہ زندگی کا اہم حصہ بنانا ہوگا۔
انہوں نے کہا کہ یہ آگاہی دوڑ صحت مند طرزِ زندگی، سماجی ہم آہنگی، اتحاد اور "فٹ انڈیا" مہم کو فروغ دینے کے مقصد سے منعقد کی گئی۔انوراگ ٹھاکر نے یہ بھی بتایا کہ ہمی پور میں ایک "سینٹر آف ایکسیلینس" کے قیام کی منظوری مل گئی ہے، جس سے ابھرتے ہوئے کھلاڑیوں کو بہتر تربیتی سہولیات اور زیادہ مواقع فراہم کیے جا سکیں گے۔
