نئی دہلی
سری لنکا میں سائبر جرائم کے خلاف جاری کارروائی کے دوران گرفتار کیے گئے تقریباً 200 غیر ملکیوں میں سے 173 افراد کا تعلق ہندوستان سے ہے۔ پولیس نے منگل کے روز یہ اطلاع دی۔
پولیس کے مطابق پیر کی رات جنوبی سیاحتی علاقوں گالے، ہیکاڈوا اور میڈیگاما میں 173 ہندوستانی اور 25 نیپالی شہریوں سمیت مجموعی طور پر 198 غیر ملکیوں کے ایک گروہ کو گرفتار کیا گیا۔
حکام نے بتایا کہ گرفتار افراد کی عمر 25 سے 35 سال کے درمیان ہے۔ ان پر الزام ہے کہ وہ سیاحتی ویزا کی مدت ختم ہونے کے باوجود ملک میں مقیم تھے، غیر قانونی طور پر روزگار حاصل کرنے کی کوشش کر رہے تھے، ڈیوٹی فری درآمد شدہ سگریٹ رکھنے اور سائبر جرائم سے متعلق سرگرمیوں میں ملوث تھے۔ ان کے خلاف مقدمات درج کیے جائیں گے۔
یہ گرفتاریاں گزشتہ ہفتے 250 چینی شہریوں کی اسی نوعیت کے الزامات میں گرفتاری کے بعد عمل میں آئیں۔ رپورٹ کے مطابق رواں سال کے آغاز سے 5 مئی تک سری لنکا میں عارضی طور پر مقیم 628 غیر ملکی شہریوں کو سائبر جرائم میں ملوث ہونے کے الزام میں گرفتار کیا جا چکا ہے۔ ان میں ہندوستان، چین، ویتنام، میانمار، فلپائن اور کمبوڈیا کے شہری شامل ہیں۔
