نئی دہلی: صفدر جنگ اسپتال کی میڈیکل سپرنٹنڈنٹ ڈاکٹر چارو بمبا نے ہفتہ کو بتایا کہ ماحولیاتی کارکن سونم وانگچک کی حالت مستحکم ہے، وہ مکمل ہوش میں ہیں، تاہم طویل بھوک ہڑتال کے باعث انہیں جسم میں پانی کی معمولی کمی (ڈی ہائیڈریشن) اور کمزوری کا سامنا ہے۔

ڈاکٹر چارو بمبا نے بتایا کہ سونم وانگچک کو صبح تقریباً 7:40 بجے صفدر جنگ اسپتال لایا گیا، جہاں ڈاکٹروں کی ٹیم مسلسل ان کی نگرانی کر رہی ہے۔

انہوں نے کہا، "طویل روزہ رکھنے کی وجہ سے وہ کچھ کمزور ہیں اور انہیں معمولی ڈی ہائیڈریشن ہے، تاہم ان کے تمام اہم طبی اشاریے (Vital Parameters) مستحکم ہیں۔ ان کا مسلسل معائنہ کیا جا رہا ہے اور علاج جاری ہے۔"

انہوں نے مزید بتایا کہ وانگچک مکمل طور پر ہوش میں ہیں۔ اسپتال پہنچنے پر ایمرجنسی میڈیسن شعبے نے ابتدائی طبی امداد فراہم کی، جس کے بعد انہیں شعبۂ میڈیسن میں داخل کر دیا گیا۔ ان کی مجموعی حالت اطمینان بخش ہے۔

ڈاکٹر چارو بمبا کے مطابق جسم میں پانی کی کمی کے باعث الیکٹرولائٹ کا توازن متاثر ہوا ہے، جسے درست کرنے کے لیے انہیں کچھ عرصہ اسپتال میں زیر نگرانی رکھا جائے گا۔ اس کے بعد دوبارہ ان کی طبی حالت کا جائزہ لیا جائے گا۔

ذرائع کے مطابق سونم وانگچک کی دیکھ بھال کے لیے صفدر جنگ اسپتال کے دو ڈاکٹروں اور دو پیرا میڈیکل اہلکاروں کو خصوصی طور پر تعینات کیا گیا ہے۔

دہلی پولیس ذرائع کا کہنا ہے کہ ہفتہ کی صبح رام منوہر لوہیا (RML) اسپتال کے ڈاکٹروں اور پیرا میڈیکل عملے نے بھی وانگچک کا طبی معائنہ کیا تھا اور بگڑتی ہوئی صحت کے پیش نظر انہیں اسپتال میں داخل ہونے کا مشورہ دیا تھا، تاہم انہوں نے ابتدا میں اس مشورے کو قبول کرنے سے انکار کر دیا۔

بعد ازاں صحت کی مزید خرابی اور ڈاکٹروں کی سفارش پر دہلی پولیس نے انہیں جنتر منتر کے احتجاجی مقام سے ایمبولینس کے ذریعے صفدر جنگ اسپتال منتقل کر دیا۔

اسی دوران نئی دہلی کے ڈپٹی کمشنر آف پولیس (ڈی سی پی) کے دفتر میں دہلی پولیس کے سینئر افسران کا ایک اجلاس بھی منعقد ہوا، جس میں سونم وانگچک کی منتقلی، موجودہ صورتحال اور جنتر منتر پر امن و امان کے انتظامات کا جائزہ لیا گیا۔

اجلاس میں اسپیشل سی پی (لاء اینڈ آرڈر) دیویش چندر سریواستو، جوائنٹ سی پی دیپک پروہت، ڈی سی پی سچن شرما، ایڈیشنل ڈی سی پی آنند مشرا اور ڈی سی پی (اسپیشل سیل) منیشی چندر سمیت دیگر اعلیٰ افسران شریک ہوئے۔

واضح رہے کہ دہلی پولیس کے مطابق سونم وانگچک کو دہلی ہائی کورٹ کے احکامات اور ڈاکٹروں کے مشورے پر، ان کی بگڑتی ہوئی صحت کے پیش نظر اسپتال منتقل کیا گیا، جبکہ کارروائی کے دوران پولیس نے زیادہ سے زیادہ تحمل کا مظاہرہ کیا۔

سونم وانگچک ملک بھر میں امتحانی بے ضابطگیوں، خصوصاً نیٹ (NEET) پیپر لیک معاملے پر مرکزی وزیر تعلیم دھرمیندر پردھان کے استعفے کے مطالبے کے حق میں گزشتہ 20 دنوں سے بھوک ہڑتال پر تھے۔

دہلی پولیس کی اس کارروائی پر عام آدمی پارٹی، سماجوادی پارٹی، کانگریس اور ترنمول کانگریس سمیت کئی اپوزیشن جماعتوں نے تنقید کی ہے، جبکہ بائیں بازو کی طلبہ تنظیموں نے بھی کاکروچ جنتا پارٹی (CJP) کے زیر اہتمام جنتر منتر پر جاری احتجاج میں شرکت کی۔

سی جے پی کے بانی ابھیجیت دیپکے نے اعلان کیا ہے کہ سونم وانگچک کے خلاف کارروائی کے باوجود احتجاج جاری رہے گا اور وہ خود غیر معینہ مدت کی بھوک ہڑتال کریں گے۔