امیٹھی (اتر پردیش): سابق مرکزی وزیر اور بی جے پی رہنما اسمِرتی ایرانی کا نام امیٹھی ضلع کے میڈن ماوئی گاؤں کی پنچایت ووٹر فہرست میں شامل نہیں کیا گیا، حالانکہ ان کا نام اسی علاقے کی لوک سبھا اور اسمبلی انتخابی فہرستوں میں موجود ہے۔ حکام نے جمعہ کے روز یہ معلومات دی۔

امیٹھی کے ضلع مجسٹریٹ سنجے چوہان نے کہا کہ اس معاملے کی تحقیقات کا حکم دے دیا گیا ہے۔ اسمِرتی ایرانی 2019 سے 2024 تک امیٹھی سے لوک سبھا رکن رہ چکی ہیں۔ 2019 کے پارلیمانی انتخابات میں کامیابی کے بعد انہوں نے گوری گنج اسمبلی حلقے کے تحت آنے والے میڈن ماوئی گاؤں میں ایک رہائش گاہ تعمیر کی تھی۔

وہ اسی گاؤں کی ووٹر کے طور پر رجسٹرڈ ہیں اور لوک سبھا انتخابات کے دوران وہیں اپنا ووٹ بھی ڈال چکی ہیں۔ یہ معاملہ 10 جون کو پنچایت ووٹر فہرست کی اشاعت کے بعد سامنے آیا، جس میں ان کا نام موجود نہیں تھا۔ نام خارج ہونے کے بارے میں سوال پر ضلع مجسٹریٹ سنجے چوہان نے کہا کہ اصل وجہ تحقیقات مکمل ہونے اور رپورٹ موصول ہونے کے بعد ہی معلوم ہو سکے گی۔

بی جے پی کے امیٹھی ضلع صدر سدھانشو شکلا نے بتایا کہ اسمِرتی ایرانی کا نام پنچایت ووٹر فہرست میں شامل کرنے کے لیے درخواست جمع کرا دی گئی ہے اور اس معاملے سے اعلیٰ حکام کو بھی آگاہ کر دیا گیا ہے۔ شکلا کے مطابق متعلقہ حکام نے یقین دہانی کرائی ہے کہ ضروری جانچ پڑتال کے بعد ان کا نام فہرست میں شامل کر لیا جائے گا۔ واضح رہے کہ اسمِرتی ایرانی 2024 کے لوک سبھا انتخابات میں امیٹھی سے کانگریس کے رہنما کشوری لال شرما کے ہاتھوں شکست کھا گئی تھیں۔