بیجاپور (چھتیس گڑھ)۔سکیورٹی فورسز نے چھتیس گڑھ کے بیجاپور ضلع میں 11 نومبر کو ہونے والی جھڑپوں کے دوران ہلاک ہونے والے چھ ماؤ وادیوں کی لاشیں برآمد کر لی ہیں جن میں تین خواتین بھی شامل ہیں۔ پولیس کے مطابق ہلاک شدگان کی شناخت کر لی گئی ہے۔انسپکٹر جنرل آف پولیس بستر پی سندر راج نے بتایا کہ 11 نومبر کو بیجاپور ضلع میں سی پی ماؤ وادی تنظیم کی موجودگی کے شبہے کی بنیاد پر آپریشن شروع کیا گیا تھا۔ اس کارروائی میں بیجاپور اور دانتے واڑہ کے ڈسٹرکٹ ریزرو گارڈز، اسپیشل ٹاسک فورس اور دیگر سکیورٹی ایجنسیاں شامل تھیں۔

انہوں نے کہا کہ کارروائی کے دوران سکیورٹی فورسز اور ماؤ وادیوں کے درمیان کئی جھڑپیں ہوئیں جن کے بعد موقع سے چھ ماؤ وادیوں کی لاشیں برآمد کی گئیں۔ ہلاک ہونے والوں میں ڈویژنل کمیٹی کے رکن کنّا شامل ہیں جو سنٹرل ایریا کمیٹی کے انچارج تھے۔ ان کے علاوہ ایریا کمیٹی کے رکن جگت اور پارٹی کے دیگر اراکین منگلی اور بھگت بھی شامل ہیں۔آئی جی سندر راج نے بتایا کہ جائے وقوعہ سے بڑی تعداد میں جدید اسلحہ برآمد ہوا ہے جن میں اے کے 47، ایل ایم جی اور انساس رائفلیں شامل ہیں۔ انہوں نے کہا کہ ہماری فورسز پوری طرح تیار اور باصلاحیت ہیں۔انہوں نے مزید کہا کہ ہم پُر امید ہیں کہ 31 مارچ 2026 تک چھتیس گڑھ کو نکسل ازم سے مکمل طور پر آزاد کر دیا جائے گا۔ گزشتہ 20 مہینوں میں 2200 سے زائد نکسل جنگجوؤں نے ہتھیار ڈال کر عام زندگی اختیار کی ہے۔

آئی جی سندر راج نے کہا کہ بائیں بازو کی انتہاپسندی نہ صرف بستر اور چھتیس گڑھ بلکہ ملک کے کئی حصوں کے لیے دہائیوں سے ایک بڑا سکیورٹی چیلنج رہی ہے۔ پچھلے چند سال سکیورٹی فورسز کے لیے فیصلہ کن ثابت ہوئے ہیں۔ پچھلے دو برسوں میں بستر خطے میں 450 سے زائد نکسلائٹ جنگجو مارے گئے جن میں اعلیٰ کمانڈر باسوراجو سمیت کئی سرکردہ رہنما شامل تھے۔ گزشتہ چند مہینوں میں 300 سے زائد ماؤ وادیوں نے تشدد کا راستہ چھوڑ کر قومی دھارے میں شمولیت اختیار کی ہے۔