نئی دہلی

راجیہ سبھا میں اپنی دو تہائی نشستیں کھونے کے بعد، جب عام آدمی پارٹی کے کئی اراکین پارٹی چھوڑ کر بی جے پی میں شامل ہو گئے، اب پارٹی نے نئی حکمتِ عملی پر کام شروع کر دیا ہے۔ اس صورتحال پر پارٹی قیادت کے درمیان مسلسل غور و خوض جاری ہے۔ گزشتہ رات دیر گئے گجرات کے دورے سے واپسی کے بعد سینئر رہنما منیش سسودیا نے پارٹی کے کنوینر اروند کیجریوال سے ان کی رہائش گاہ پر ملاقات کی۔

منیش سسودیا گجرات کے میونسپل انتخابات کے سلسلے میں راجکوٹ میں پارٹی کے لیے انتخابی مہم چلا رہے تھے۔ پارٹی ذرائع کے مطابق، "دیر رات دہلی واپس آنے کے بعد سسودیا سیدھے ایئرپورٹ سے پارٹی کنوینر اروند کیجریوال کی رہائش گاہ پہنچے۔ دونوں رہنماؤں کے درمیان آدھے گھنٹے سے زائد وقت تک ملاقات ہوئی۔ اس دوران پارٹی میں ہونے والی ٹوٹ پھوٹ کے ممکنہ اثرات اور آئندہ کی حکمتِ عملی پر بھی تبادلہ خیال کیا گیا۔

یہ پیش رفت اس وقت سامنے آئی ہے جب راگھو چڈھا نے کہا کہ انہوں نے، عام آدمی پارٹی کے چھ دیگر راجیہ سبھا اراکین کے ساتھ، قواعد کے مطابق ایوان کے چیئرمین کو پارٹی چھوڑنے کی اطلاع دے دی ہے۔ اب عام آدمی پارٹی بھی اس معاملے پر راجیہ سبھا کے چیئرمین کو خط بھیجنے کی تیاری کر رہی ہے۔پارٹی ذرائع نے بتایا کہ ایوانِ بالا کے چیف وِپ این ڈی گپتا، راگھو چڈھا، سندیپ پاٹھک اور اشوک متل کے خلاف راجیہ سبھا کے چیئرمین کو خط جمع کرائیں گے۔

گپتا کے خط میں انسدادِ انحراف قانون کے تحت کارروائی کا مطالبہ کیا جائے گا۔ یہ تینوں رہنما عوامی سطح پر بی جے پی میں شامل ہوتے نظر آئے ہیں، جبکہ باقی چار کو اس طرح عوامی طور پر شامل ہوتے نہیں دیکھا گیا۔ اسی لیے چیف وِپ ان تین اراکین کے خلاف شکایت درج کریں گے جنہیں بی جے پی کے دفتر میں دیکھا گیا۔عام آدمی پارٹی کے سینئر رہنما سنجے سنگھ نے بھی اعلان کیا تھا کہ وہ راجیہ سبھا کے چیئرمین کو خط لکھیں گے اور آئین کے دسویں شیڈول کے تحت ان تین اراکین کی نااہلی کا مطالبہ کریں گے، جس میں پارٹی چھوڑنے کی بنیاد پر نااہلی کی شقیں درج ہیں۔

پارٹی میں اختلافات گزشتہ کئی ہفتوں سے بڑھ رہے تھے، اور اس وقت کھل کر سامنے آئے جب پارٹی قیادت نے راگھو چڈھا کو راجیہ سبھا میں نائب لیڈر کے عہدے سے ہٹا دیا۔ اس کے بعد کئی رہنماؤں نے ان پر تنقید کی اور بی جے پی کے تئیں نرم رویہ اختیار کرنے کا الزام عائد کیا۔

ان کی جگہ مقرر کیے گئے اشوک کمار متل بھی بعد میں بی جے پی میں شامل ہو گئے، ان کے ساتھ سندیپ پاٹھک، ہربھجن سنگھ، راجندر گپتا، وکرم جیت سنگھ ساہنی اور سواتی مالیوال بھی بی جے پی میں شامل ہو گئے۔