نئی دہلی

لوک سبھا میں قائدِ حزبِ اختلاف راہل گاندھی نے منگل کے روز وزیر اعظم نریندر مودی سے مطالبہ کیا کہ وہ ایران کے سپریم لیڈر آیت اللہ سید علی خامنہ ای کے قتل پر کھل کر بیان دیں۔ انہوں نے کہا کہ اس معاملے پر خاموشی دنیا میں ہندوستان کی ساکھ کو کمزور کر رہی ہے۔

راہل گاندھی نے کہا کہ ہندوستان کو اس تنازع پر "اخلاقی طور پر واضح" مؤقف اپنانا چاہیے اور بین الاقوامی قانون اور انسانی جانوں کے دفاع کے لیے "جرأت کے ساتھ" بات کرنی چاہیے۔

انہوں نے سوشل میڈیا پلیٹ فارم ‘ایکس’ پر لکھا، "ہندوستان کو اخلاقی طور پر واضح ہونا چاہیے۔ ہمیں بین الاقوامی قانون اور انسانی جانوں کے تحفظ کے لیے صاف گوئی سے بات کرنے کی ہمت ہونی چاہیے۔ ہماری خارجہ پالیسی خودمختاری اور تنازعات کے پُرامن حل پر مبنی ہے، اور اسے اسی اصول پر قائم رہنا چاہیے۔انہوں نے مزید کہا كہ وزیر اعظم مودی کو بولنا چاہیے۔ کیا وہ عالمی نظام کے تعین کے لیے کسی سربراہِ مملکت کے قتل کی حمایت کرتے ہیں؟ اس وقت کی خاموشی دنیا میں ہندوستان کی حیثیت کو کم کر رہی ہے۔

مغربی ایشیا میں بڑھتی ہوئی کشیدگی پر تشویش ظاہر کرتے ہوئے انہوں نے بات چیت اور تحمل کی اپیل بھی کی تاکہ امن بحال ہو سکے۔انہوں نے کہا كہ امریکہ، اسرائیل اور ایران کے درمیان بڑھتی ہوئی جھڑپیں ایک نازک خطے کو وسیع تر جنگ کی طرف دھکیل رہی ہیں۔ کروڑوں افراد، جن میں تقریباً ایک کروڑ ہندوستانی بھی شامل ہیں، غیر یقینی صورتحال کا سامنا کر رہے ہیں۔ اگرچہ سیکیورٹی خدشات حقیقی ہیں، مگر خودمختاری کی خلاف ورزی کرنے والے حملے بحران کو مزید سنگین بنا دیں گے۔ ایران پر یکطرفہ حملوں کے ساتھ ساتھ ایران کی جانب سے دیگر مشرقِ وسطیٰ ممالک پر حملوں کی بھی مذمت ہونی چاہیے۔ تشدد، تشدد کو جنم دیتا ہے — امن کا واحد راستہ مکالمہ اور تحمل ہے۔

ادھر اسرائیل نے منگل کے روز ایران اور بیروت دونوں مقامات پر حملے کیے، جس سے کشیدگی مزید بڑھ گئی، جبکہ ایران نے جوابی کارروائی میں ریاض میں امریکی سفارت خانے کو نشانہ بنایا۔ریاض میں امریکی سفارت خانے پر ڈرون حملہ کیا گیا۔ رپورٹ کے مطابق آپریشن "ایپک فیوری" میں مزید دو امریکی فوجی ہلاک ہوئے، جس کے بعد ہلاکتوں کی تعداد چھ ہو گئی۔

امریکی سینٹرل کمانڈ نے منگل کو کہا کہ امریکی افواج نے ایرانی فوجی ڈھانچے کے اہم اہداف کے خلاف مسلسل کارروائیاں کیں، جن میں اسلامی انقلابی گارڈ کور  سے منسلک تنصیبات بھی شامل تھیں۔

دوسری جانب الجزیرہ نے رپورٹ کیا کہ ایران نے بحرین میں امریکی فضائی اڈے پر "بڑے پیمانے پر میزائل اور ڈرون" حملہ کرنے کا دعویٰ کیا ہے۔منگل کی صبح ڈرون اور میزائل حملے میں بحرین میں واقع امریکی فضائی اڈے کی مرکزی کمانڈ عمارت کو تباہ کر دیا گیا۔ بیان میں کہا گیا کہ 20 ڈرون اور 3 میزائل شیخ عیسیٰ بیس پر گرے، جس سے ایندھن کے ٹینکوں میں آگ لگ گئی۔

آیت اللہ خامنہ ای کی ہلاکت کے بعد مشترکہ امریکی-اسرائیلی حملوں کے جواب میں ایران نے خطے میں امریکی مفادات اور اتحادیوں پر بیلسٹک میزائل اور ڈرون حملے کیے، جن میں اسرائیل، بحرین، کویت، قطر، متحدہ عرب امارات اور اردن شامل ہیں، جس سے تنازع مزید پھیل گیا اور شہریوں و بیرونِ ملک مقیم افراد کے لیے خطرات بڑھ گئے۔

عالمی رہنما اور بین الاقوامی ادارے اس وقت کشیدگی کم کرنے کی اپیل کر رہے ہیں کیونکہ وسیع علاقائی جنگ کا خطرہ بڑھتا جا رہا ہے، تاہم لڑائی بغیر کسی واضح اختتام کے جاری ہے۔