موہالی: ہندوستانی کپتان شبمن گل کی آمد نے اتوار کو پنجاب کنگز کی جانب سے منعقدہ شیراے پنجاب ٹی20 لیگ میں جوش پیدا کر دیا۔ میچ نمبر 15 میں فاضلکا فالکنز نے ارشدیپ سنگھ کی قیادت والی لدھیانہ لائنز کو سنسنی خیز مقابلے میں صرف ایک رن سے شکست دے دی۔ گل نے سیزن میں فالکنز کی جانب سے اپنا پہلا میچ کھیلتے ہوئے 21 گیندوں پر 40 رنز کی شاندار اننگز کھیلی، جس میں سات چوکے اور ایک چھکا شامل تھا۔ انہیں میچ کا بہترین کھلاڑی قرار دیا گیا۔ میدان میں اترتے ہی گل نے شاندار بیٹنگ کرتے ہوئے شائقین کو اپنی صلاحیتوں کی جھلک دکھا دی۔ لدھیانہ لائنز کے کپتان اور ہندوستانی تیز گیند باز ارشدیپ سنگھ نے ٹاس جیت کر پہلے گیند بازی کا فیصلہ کیا۔
اس کے بعد گل نے جارحانہ انداز میں بیٹنگ کرتے ہوئے فالکنز کو تیز شروعات دلائی۔ تاہم لدھیانہ نے کارتک چڈھا کی شاندار گیند بازی کی بدولت میچ میں واپسی کی۔ چڈھا نے گل کی اہم وکٹ حاصل کی اور اپنے چار اوورز میں صرف 9 رنز دے کر چار وکٹیں حاصل کیں، جس سے فاضلکا کی رنز بنانے کی رفتار پر بریک لگ گئی۔
اس کے باوجود پریرت دتہ نے 23 گیندوں پر 36 اور جے ویر بھنڈر سنگھ نے 18 گیندوں پر 21 رنز بنا کر فالکنز کو سنبھالا۔ فاضلکا نے 20 اوورز میں 9 وکٹوں کے نقصان پر 170 رنز بنائے اور لدھیانہ کے سامنے 171 رنز کا ہدف رکھا۔ ہدف کا تعاقب کرتے ہوئے لدھیانہ لائنز کی شروعات اچھی نہیں رہی اور فاضلکا کے گیند بازوں نے وقفے وقفے سے وکٹیں حاصل کیں۔ اوپنر کارتیک شرما نے 29 گیندوں پر 32 رنز بنا کر اننگز کو سنبھالنے کی کوشش کی، لیکن مطلوبہ رن ریٹ بڑھتا گیا اور لدھیانہ کی وکٹیں بھی گرتی رہیں۔ ایسا لگ رہا تھا کہ لدھیانہ کی ٹیم ہدف سے دور ہوتی جا رہی ہے، لیکن کرش بھگت اور مادھو پٹھانیا نے شاندار جوابی حملہ کرتے ہوئے میچ کا رخ بدل دیا۔
دونوں نے صرف 29 گیندوں پر 61 رنز کی ناقابل شکست شراکت قائم کرکے فاضلکا کے گیند بازوں پر دباؤ بڑھا دیا۔ پٹھانیا نے خاص طور پر جارحانہ بیٹنگ کرتے ہوئے صرف 16 گیندوں پر ناقابل شکست 37 رنز بنائے، جبکہ بھگت 23 گیندوں پر 28 رنز بنا کر ناٹ آؤٹ رہے۔ اس طرح آخری اوور سے قبل لدھیانہ کی ٹیم فتح کی دوڑ میں برقرار رہی۔ آخری چھ گیندوں پر لدھیانہ کو جیت کے لیے 19 رنز درکار تھے۔ میچ آخری گیند تک پہنچ گیا۔ آخری گیند پر چھ رنز درکار تھے، لیکن پٹھانیا صرف چوکا لگا سکے اور لدھیانہ کی ٹیم ہدف سے ایک رن پیچھے رہ گئی۔ اس طرح فاضلکا فالکنز نے سنسنی خیز مقابلے میں ایک رن سے کامیابی حاصل کی اور میدان میں موجود شائقین کو آخری گیند تک دلچسپ مقابلہ دیکھنے کو ملا۔
