دراس/جموں: 27ویں کارگل وجے دیوس کی تقریبات کے موقع پر ہندوستانی فوج نے لداخ کے دراس سیکٹر میں اپنی آپریشنل تیاری، جدید ٹیکنالوجی اور بلند پہاڑی علاقوں میں جنگی صلاحیتوں کا شاندار مظاہرہ کیا۔ فوج نے میڈیا نمائندوں کے لیے متاین (Matayen) میں لائیو آپریشنل مظاہرہ اور جدید فوجی سازوسامان کی نمائش کا اہتمام کیا، جس میں چھوٹی ٹیموں کے ذریعے کارروائی، ڈرونز اور ریموٹلی پائلٹڈ ایریل سسٹمز (RPAS) کے استعمال کا عملی مظاہرہ کیا گیا۔

اس کے ذریعے مشکل پہاڑی علاقوں میں جدید ٹیکنالوجی کو جنگی کارروائیوں میں شامل کرنے کی صلاحیت کو اجاگر کیا گیا۔ فائر اینڈ فیوری کور نے سوشل میڈیا پلیٹ فارم ایکس پر کہا کہ 27ویں کارگل وجے دیوس کی تقریبات کے تحت ہندوستانی فوج نے اپنی جنگی تیاری، تکنیکی جدت اور بلند پہاڑی علاقوں میں آپریشنل صلاحیتوں کا مظاہرہ کیا۔

نمائش میں فوج کی جدید نقل و حرکت اور نگرانی کے آلات پیش کیے گئے، جن میں اسپیشل موبیلیٹی وہیکلز (SMVs)، دشوار گزار علاقوں میں چلنے والی گاڑیاں، آل ٹیرین وہیکل (چیٹک)، ہائی موبیلیٹی ریکی گاڑیاں، فوری ردِعمل دینے والی جنگی گاڑیاں، جدید ڈرونز اور آر پی اے ایس شامل تھے۔

تقریب میں موجود افراد کو فوجی اہلکاروں نے مختلف جدید ہتھیاروں، نگرانی کے آلات اور دیسی فوجی ٹیکنالوجی کے بارے میں معلومات فراہم کیں، جو بلند پہاڑی علاقوں میں آپریشنل کارکردگی بہتر بنانے کے لیے تیار کی گئی ہیں۔ فوجی حکام نے کہا کہ یہ نمائش آپریشنل برتری، جدید ٹیکنالوجی اور خود انحصاری (آتم نربھر بھارت) کے عزم کی عکاسی کرتی ہے، جبکہ 1999 کی آپریشن وجے کے دوران وطن کے لیے اپنی جان قربان کرنے والے شہداء کو خراجِ عقیدت بھی پیش کرتی ہے۔