ممبئی

شیو سینا (یو بی ٹی) کے رہنما اور راجیہ سبھا رکن سنجے راوت نے جمعہ کو شیو سینا کے ہیراک مہوتسو (ڈائمنڈ جوبلی) کے موقع پر کہا کہ پارٹی نے بے شمار چیلنجز، دھوکوں اور سیاسی اتار چڑھاؤ کے باوجود اپنے 60 سالہ شاندار سفر کو کامیابی سے مکمل کیا ہے۔پریس کانفرنس سے خطاب کرتے ہوئے سنجے راوت نے ادھو ٹھاکرے کی قیادت والی شیو سینا کو "حقیقی شیو سینا" قرار دیا اور یاد دلایا کہ یہ جماعت مراٹھی عوام کے حقوق کی ایک علاقائی تحریک سے شروع ہو کر قومی سیاست میں دہلی تک اپنی پہنچ بنانے والی طاقت بن گئی۔

انہوں نے کہا کہ آج شیو سینا کی 60ویں سالگرہ اور حقیقی شیو سینا کا ہیراک مہوتسو ہے۔ شیو سینا نے 60 برس کا طویل سفر طے کیا ہے، پہلے بالاصاحب ٹھاکرے کی قیادت میں اور بعد میں معزز ادھو ٹھاکرے کی قیادت میں۔

پارٹی کے قیام کا ذکر کرتے ہوئے انہوں نے کہا کہ یہ تنظیم 60 سال قبل مراٹھی عوام کے انصاف اور حقوق کے لیے قائم کی گئی تھی۔ اُس وقت لوگ مذاق میں کہتے تھے کہ شیو سینا چھ ماہ بھی نہیں چل پائے گی۔ یہ بھی کہا جاتا تھا کہ شیو سینا کبھی ممبئی اور تھانے سے آگے نہیں بڑھ سکے گی۔

انہوں نے مزید کہا کہ یہ تمام پیش گوئیاں غلط ثابت ہوئیں۔ شیو سینا نے ممبئی، تھانے اور مہاراشٹر میں اپنی جگہ بنائی اور آخرکار دہلی تک پہنچ گئی۔ شیو سینا نے 60 سال کا طویل سفر مکمل کیا ہے۔

بالاصاحب ٹھاکرے کو بھی دھوکے ملے

پارٹی کے سیاسی سفر کا ذکر کرتے ہوئے راوت نے کہا کہ ہر سیاسی جماعت کو اتار چڑھاؤ کا سامنا کرنا پڑتا ہے۔انہوں نے کہا کہ کبھی سیاسی دھارا تیز ہوتی ہے، کبھی رک جاتی ہے اور کبھی متوازن انداز میں چلتی ہے۔ ہندو ہردیہ سمراٹ شیو سینا پرمکھ بالاصاحب ٹھاکرے کے دور میں بھی ہم نے کئی نشیب و فراز دیکھے۔ بالاصاحب کو بھی اپنے ہی لوگوں سے کئی دھوکے ملے، ان کی پیٹھ میں کئی بار خنجر گھونپا گیا۔

راوت نے بتایا کہ بالاصاحب اکثر درد بھرے انداز میں کہا کرتے تھے کہ میری پیٹھ میں اتنے خنجر گھونپے جا چکے ہیں کہ اب نئی چوٹ کے لیے جگہ ہی باقی نہیں رہی۔

شیواجی مہاراج کی مثال

سنجے راوت نے چھترپتی شیواجی مہاراج کی جدوجہد کا حوالہ دیتے ہوئے کہا کہ اندرونی مخالفت ہمیشہ سب سے بڑا چیلنج رہی ہے۔انہوں نے کہا کہ اس لیے آج جو کچھ ہو رہا ہے، اس پر ہمیں حیرت نہیں۔ شیو سینا پرمکھ ہمیشہ ہمیں مثال دیتے تھے کہ چھترپتی شیواجی مہاراج نے ہندوی سوراجیہ قائم کیا، لیکن اس راستے میں سب سے بڑی رکاوٹیں انہیں اپنے ہی لوگوں کی طرف سے آئیں۔انہوں نے مزید کہا کہ شیواجی مہاراج کو اپنے ہی لوگوں کے خلاف تقریباً 200 جنگیں لڑنی پڑیں، تب جا کر وہ اپنے مقصد میں کامیاب ہوئے اور اپنا پرچم بلند کر سکے۔

بی جے پی پر الزام

علاقائی جماعتوں کے کمزور ہونے کے حوالے سے راوت نے الزام لگایا کہ بی جے پی علاقائی سیاسی قوتوں کو کمزور کرنا چاہتی ہے۔انہوں نے کہا کہ یہ سب اس لیے ہو رہا ہے کیونکہ بی جے پی خوفزدہ ہے۔ وہ نہیں چاہتی کہ 2029 تک کانگریس کے ساتھ کوئی علاقائی جماعت کھڑی رہے۔ وہ لوک سبھا میں مطلوبہ تعداد حاصل کرکے آئین میں تبدیلی کرنا چاہتے ہیں اور ملک میں صدارتی نظام نافذ کرنا چاہتے ہیں۔ ہم ایسا نہیں ہونے دیں گے۔

ممبئی میں پوسٹروں کی جنگ

ادھر، جمعہ کے روز ممبئی کے مختلف اہم علاقوں، جن میں باندرہ، کالانگر اور ماتوشری شامل ہیں، میں ایکناتھ شندے اور ادھو ٹھاکرے کی قیادت والی شیو سینا کے پوسٹرز اور بینرز نمایاں طور پر نظر آئے، جو 2022 میں پارٹی تقسیم کے بعد سے جاری سیاسی رقابت کی عکاسی کرتے ہیں۔

"آپریشن ٹائیگر" کی قیاس آرائیاں

اس سال کی تقریبات کو اس لیے بھی اہم سمجھا جا رہا ہے کیونکہ سیاسی حلقوں میں "آپریشن ٹائیگر" کے نام سے ایک نئی بحث جاری ہے۔اس اصطلاح کا استعمال ان قیاس آرائیوں کے لیے کیا جا رہا ہے جن کے مطابق شیو سینا (یو بی ٹی) کے کئی ارکانِ پارلیمان ایکناتھ شندے کی قیادت والی شیو سینا سے رابطے میں ہیں اور حکمراں اتحاد میں شامل ہو سکتے ہیں۔یہ بحث اس وقت مزید تیز ہوئی جب شیو سینا کے ایم ایل سی چندرکانت راگھوونشی نے دعویٰ کیا کہ شیو سینا (یو بی ٹی) کے چھ ارکانِ پارلیمان نے وزیر اعلیٰ ایکناتھ شندے پر اعتماد کا اظہار کیا ہے اور ان کے دھڑے کے ساتھ صف بندی کر لی ہے۔

تاہم متعلقہ ارکانِ پارلیمان کی جانب سے ان دعوؤں کی ابھی تک کوئی سرکاری تصدیق نہیں کی گئی ہے۔

۔2022 میں ہوئی تھی شیو سینا کی تقسیم

شیو سینا کے اندر سیاسی تقسیم کا آغاز 2022 میں ہوا تھا، جب ایکناتھ شندے نے بڑی تعداد میں اراکینِ اسمبلی کے ساتھ ادھو ٹھاکرے کی قیادت کے خلاف بغاوت کر دی تھی۔اس کے بعد سیاسی اور قانونی لڑائیوں کا سلسلہ شروع ہوا، جس کے نتیجے میں الیکشن کمیشن نے شندے دھڑے کو باضابطہ شیو سینا تسلیم کرتے ہوئے پارٹی کا روایتی انتخابی نشان "تیر و کمان" الاٹ کر دیا، جبکہ ادھو ٹھاکرے کے دھڑے کو شیو سینا (یو بی ٹی) کے نام سے شناخت دی گئی۔