نئی دہلی
جمعہ کے روز ابتدائی کاروبار کے دوران شیئر بازار میں تیزی دیکھی گئی اور سینسیکس و نفٹی دونوں مثبت رجحان کے ساتھ کاروبار کرتے نظر آئے۔بی ایس ای سینسیکس ابتدائی کاروبار میں 545.89 پوائنٹس کے اضافے کے ساتھ 78,048.01 پوائنٹس پر پہنچ گیا، جبکہ این ایس ای نفٹی 173.85 پوائنٹس چڑھ کر 24,346.90 پوائنٹس پر ٹریڈ کر رہا تھا۔
سینسیکس میں شامل 30 کمپنیوں میں ایچ سی ایل ٹیک، بجاج فنسرو، ٹاٹا اسٹیل، ٹیک مہندرا، بھارت الیکٹرانکس اور ٹاٹا کنسلٹنسی سروسز کے حصص میں سب سے زیادہ اضافہ ریکارڈ کیا گیا۔ دوسری جانب، مہندرا اینڈ مہندرا، اسٹیٹ بینک آف انڈیا، این ٹی پی سی اور انٹرگلوب ایوی ایشن کے حصص میں گراوٹ دیکھی گئی۔
ایشیائی بازاروں میں جنوبی کوریا کا کوسپی، جاپان کا نکی-225، چین کا ایس ایس ای کمپوزٹ اور ہانگ کانگ کا ہینگ سینگ انڈیکس بھی تیزی کے ساتھ کاروبار کر رہے تھے۔
امریکی شیئر بازاروں میں جمعرات کے روز ملا جلا رجحان دیکھنے میں آیا۔ ڈاؤ جونز انڈسٹریل ایوریج میں 1.14 فیصد اضافہ ہوا، جبکہ نیسڈیک کمپوزٹ 0.80 فیصد گر گیا۔ ایس اینڈ پی 500 تقریباً بغیر کسی تبدیلی کے بند ہوا۔
بین الاقوامی معیار کے برینٹ خام تیل کی قیمت 0.63 فیصد کمی کے ساتھ تقریباً 72.25 امریکی ڈالر فی بیرل رہی۔شیئر بازار کے اعداد و شمار کے مطابق، غیر ملکی ادارہ جاتی سرمایہ کار (ایف آئی آئی) جمعرات کے روز خالص فروخت کنندہ رہے اور انہوں نے 311.82 کروڑ روپے مالیت کے حصص فروخت کیے۔
واضح رہے کہ جمعرات کے روز سینسیکس 579.48 پوائنٹس اور نفٹی 169.85 پوائنٹس کے اضافے کے ساتھ بند ہوئے تھے۔
