ریاض

سعودی عرب نے عراق کے خودمختار کرد علاقے میں قائم متحدہ عرب امارات کے قونصل خانے پر حملے کی شدید مذمت کی ہے۔سعودی عرب کی وزارتِ خارجہ نے اس حملے پر سخت ردِعمل ظاہر کرتے ہوئے کہا کہ سفارتی عمارتوں کو بار بار نشانہ بنانا بین الاقوامی قوانین کی کھلی خلاف ورزی ہے۔

سفارتی مشن پر یہ حملہ منگل کی صبح اس وقت کیا گیا جب خلیجی ملک نے چند گھنٹے قبل ہی جاری مشرقِ وسطیٰ کے تنازع میں خود کو “ناانصافی کے ساتھ نشانہ بنائے جانے” پر ناراضی ظاہر کی تھی۔

عراق کے کرد علاقے میں واقع متحدہ عرب امارات کے قونصل خانے کی عمارت فضائی حملے کے دوران جزوی طور پر متاثر ہوئی۔ سرکاری اطلاعات کے مطابق اس واقعے میں کسی جانی نقصان کی اطلاع نہیں ملی۔یہ حملہ خطے میں کشیدگی میں نمایاں اضافے کے بعد سامنے آیا ہے۔ اس کشیدگی کا آغاز اٹھائیس فروری کو ایران کے خلاف امریکہ اور اسرائیل کی مشترکہ فوجی کارروائیوں سے ہوا تھا۔

حملے کے جواب میں متحدہ عرب امارات کی وزارتِ خارجہ نے کہا کہ یہ کارروائی خطرناک کشیدگی اور خطے کے امن و استحکام کے لیے سنگین خطرہ ہے۔ وزارت نے زور دیتے ہوئے کہا کہ سفارتی مشنوں اور عمارتوں کو نشانہ بنانا تمام بین الاقوامی اصولوں اور قوانین کی صریح خلاف ورزی ہے۔

اگرچہ متحدہ عرب امارات نے سفارتی استثنا کی خلاف ورزی کی سخت مذمت کی ہے، تاہم وزارتِ خارجہ نے یہ واضح نہیں کیا کہ حملے میں استعمال ہونے والا بغیر پائلٹ طیارہ کہاں سے آیا یا اسے کس نے بھیجا۔منگل کی صبح ہونے والا یہ حملہ اس کے ایک دن بعد سامنے آیا جب متحدہ عرب امارات نے پیر کے روز باضابطہ شکایت کی تھی کہ اسے “بلا جواز طریقے سے نشانہ بنایا جا رہا ہے”۔ ملک نے یہ بھی واضح کیا کہ وہ اس جنگ کا حصہ نہیں بننا چاہتا اور ایران کے خلاف کسی حملے میں شریک نہیں ہے۔

دریں اثنا بڑھتے ہوئے خطرات کے پیش نظر آسٹریلیا نے متحدہ عرب امارات کی دفاعی صلاحیت مضبوط بنانے کے لیے فوجی وسائل بھیجنے کا اعلان کیا ہے۔ آسٹریلیا کے وزیرِ اعظم انتھونی البانیزی نے پیر کے روز تصدیق کی کہ احتیاطی اقدام کے طور پر میزائل اور طیارے خطے میں بھیجے جائیں گے۔

انہوں نے صحافیوں سے گفتگو کرتے ہوئے کہا کہ ہماری شمولیت مکمل طور پر دفاعی نوعیت کی ہے اور یہ فیصلہ خطے میں موجود آسٹریلوی شہریوں اور متحدہ عرب امارات میں ہمارے دوستوں کے تحفظ کے لیے کیا گیا ہے۔

اس تعیناتی کے تحت آسٹریلیا بوئنگ کمپنی کا تیار کردہ ابتدائی فضائی نگرانی اور کنٹرول کا نظام رکھنے والا ای۔سیون اے ویج ٹیل طیارہ بھی بھیجے گا۔ توقع ہے کہ یہ طیارہ ابتدائی طور پر چار ہفتوں تک خلیجی ممالک کی فضائی حدود کی نگرانی اور حفاظت کے لیے کام کرے گا۔

اس کے علاوہ وزیرِ اعظم نے بتایا کہ درمیانی فاصلے تک مار کرنے والے جدید فضاء سے فضاء میں مار کرنے والے میزائل بھی متحدہ عرب امارات کو فراہم کیے جائیں گے۔ یہ فیصلہ وزیرِ اعظم البانیزی اور متحدہ عرب امارات کے صدر شیخ محمد بن زاید النہیان کے درمیان اعلیٰ سطحی ٹیلی فون گفتگو کے بعد کیا گیا۔

ادھر خطے میں جاری وسیع تر تنازع کو اب دس دن سے زیادہ کا عرصہ گزر چکا ہے، تاہم امریکہ کے صدر ڈونلڈ ٹرمپ نے پیر کے روز اشارہ دیا کہ فوجی مہم جلد ختم ہو سکتی ہے۔انہوں نے کہا کہ ہم اس خطرے کو ہمیشہ کے لیے ختم کر رہے ہیں اور اس کا نتیجہ یہ ہوگا کہ امریکی خاندانوں کے لیے تیل اور گیس کی قیمتیں کم ہو جائیں گی۔

اسی روز بعد میں صدر نے ایران میں فوجی کارروائیوں کو عارضی قدم قرار دیتے ہوئے کہا کہ یہ مداخلت خطے کے خطرات سے نمٹنے کے لیے ایک مختصر مہم ہے۔انہوں نے مزید کہا کہ ہم نے مشرقِ وسطیٰ میں تھوڑی سی مہم چلائی تاکہ کچھ برائی کا خاتمہ کیا جا سکے اور میرا خیال ہے کہ آپ دیکھیں گے کہ یہ ایک مختصر کارروائی ثابت ہوگی۔