نئی دہلی
عام آدمی پارٹی کے سینئر رہنما سنجے سنگھ نے ہفتہ کے روز راجیہ سبھا کے اراکین کے بی جے پی میں شامل ہونے پر سخت ردِعمل ظاہر کرتے ہوئے اسے غیر آئینی اور پارلیمانی قواعد کے خلاف قرار دیا۔انہوں نے الزام لگایا کہ جس طریقے سے اراکین بی جے پی میں شامل ہوئے، وہ آئینی دفعات اور انسدادِ انحراف قانون کی خلاف ورزی ہے۔ سنگھ نے کہا، "سات افراد نے جس انداز میں بی جے پی میں شامل ہونے کا اعلان کیا، وہ غیر آئینی، غیر قانونی اور قواعد کے خلاف ہے۔ یہ قانونی طور پر بالکل غلط ہے۔
انسدادِ انحراف قانون کا حوالہ دیتے ہوئے انہوں نے کہا کہ یہ قانون واضح طور پر کہتا ہے کہ اسمبلی، راجیہ سبھا یا لوک سبھا میں کسی بھی قسم کی توڑ پھوڑ یا گروہ بندی کی اجازت نہیں ہے اور اس کی کوئی آئینی حیثیت نہیں ہوتی۔
اپنے موقف کو دہراتے ہوئے سنگھ نے کہا کہ اراکین کا یہ فیصلہ باطل ہے اور اس کے خلاف سخت کارروائی کا مطالبہ کیا۔ انہوں نے کہا کہ عام آدمی پارٹی کے سات راجیہ سبھا اراکین جنہوں نے پارٹی بدلی ہے یہ غیر قانونی، غلط، غیر آئینی اور پارلیمانی اصولوں کے خلاف ہے۔
انہوں نے مزید اعلان کیا کہ وہ اس معاملے کو راجیہ سبھا کے چیئرمین تک لے جائیں گے۔ انہوں نے کہا کہ اسی لیے آج میں راجیہ سبھا کے چیئرمین، معزز نائب صدر کو خط لکھوں گا، تمام قواعد کا حوالہ دیتے ہوئے درخواست کروں گا کہ ان ساتوں اراکین کی رکنیت مکمل طور پر ختم کی جائے۔
انہوں نے یہ بھی الزام لگایا کہ باضابطہ شمولیت سے پہلے کچھ اراکین کو بی جے پی قیادت کے ساتھ دیکھا گیا تھا۔ انہوں نے کہا کہ ان میں سے کم از کم تین افراد کل واضح طور پر بی جے پی دفتر جاتے ہوئے دیکھے گئے۔ یہ معاملہ اس وقت سامنے آیا جب عام آدمی پارٹی کو بڑا دھچکا لگا، کیونکہ اس کے راجیہ سبھا کے اراکین، جن میں راگھو چڈھا بھی شامل ہیں، جمعہ کے روز بی جے پی میں شامل ہو گئے۔
قومی دارالحکومت میں جمعہ کو پریس کانفرنس سے خطاب کرتے ہوئے راگھو چڈھا نے کئی ہفتوں سے جاری اختلافات کو باضابطہ شکل دیتے ہوئے اعلان کیا کہ ایوانِ بالا میں پارٹی کے دو تہائی اراکین بی جے پی میں ضم ہو جائیں گے۔ اس فیصلے پر عام آدمی پارٹی کے رہنماؤں نے سخت ناراضی ظاہر کی، جبکہ بی جے پی نے اس کا خیرمقدم کیا۔
