نئی دہلی: بہار کے وزیراعلیٰ سمراٹ چودھری نے ہفتے کے روز مغربی بنگال کے وزیر اعلیٰ کے طور پر حلف لینے پر شبھندو ادھیکاری اور ان کی کابینہ کے ارکان کو مبارکباد دیتے ہوئے اعتماد ظاہر کیا کہ بھارتیہ جنتا پارٹی (بی جے پی) کی حکومت ریاست میں ترقی اور بہتر حکمرانی کے نئے دور کا آغاز کرے گی۔
شبھندو ادھیکاری نے کولکتہ کے بریگیڈ پریڈ گراؤنڈ میں مغربی بنگال کے پہلے بی جے پی وزیر اعلیٰ کے طور پر حلف لیا۔ ان کے بعد پارٹی کے ارکان اسمبلی دلیپ گھوش، اگنی مترا پال، اشوک کیرتنیا، چھدیرام ٹڈو اور نشیتھ پرمانک نے وزارتی عہدوں کا حلف لیا۔
چودھری نے سوشل میڈیا پلیٹ فارم ‘ایکس’ پر اپنے پیغام میں لکھا: “مغربی بنگال میں ترقی پر مبنی بی جے پی حکومت قائم ہوئی ہے۔ میں حلف لینے والے تمام وزراء کو دل کی گہرائیوں سے مبارکباد دیتا ہوں اور مجھے پورا یقین ہے کہ وزیر اعلیٰ شبھندو ادھیکاری کی قیادت اور وزیر اعظم نریندر مودی کے رہنمائی میں یہ حکومت ریاست میں اچھی حکمرانی، سلامتی، خوشحالی اور عوامی فلاح کا سنہری باب لکھے گی۔”
انہوں نے کہا کہ بی جے پی کو ملا تاریخی مینڈیٹ مغربی بنگال میں ترقی، مواقع اور خود اعتمادی کے ایک نئے دور کی شروعات ہے۔ انہوں نے مزید کہا کہ بی جے پی حکومت عوام کی امیدوں میں نئی توانائی پیدا کرے گی اور “ترقی یافتہ بنگال” کے خواب کو حقیقت میں بدلنے کی سمت میں آگے بڑھے گی۔
