ماسکو/ آواز دی وائس

روسی خبر رساں ایجنسی ٹی اے ایس ایس  کے مطابق روسی صدر ولادیمیر پوتن ہندوستان کے دو روزہ سرکاری دورے کے لیے روس سے روانہ ہوگئے ہیں۔ روسی میڈیا کے مطابق وفد تجارت و اقتصادیات، سائنسی و تکنیکی تعاون، ثقافتی اور انسانی شعبوں میں تعاون پر جامع بات چیت کرے گا۔ اس کے علاوہ موجودہ عالمی اور علاقائی امور بھی ایجنڈے میں شامل ہوں گے۔

ٹی اے ایس ایس کے مطابق اس دورے کے دوران دونوں ممالک کے درمیان دس بین الحکومتی دستاویزات اور پندرہ سے زائد تجارتی و غیر تجارتی معاہدوں اور مفاہمت ناموں پر دستخط کیے جانے کی تیاریاں جاری ہیں۔ پوتن آج شام نئی دہلی پہنچیں گے، جہاں وہ ہندوستان-روس سالانہ سربراہی اجلاس (23واں ایڈیشن) میں شرکت کریں گے۔

یہ ان کا 2022 میں یوکرین تنازعے کے آغاز کے بعد ہندوستان کا پہلا دورہ ہے۔ وہ آخری بار دسمبر 2021 میں یہاں آئے تھے۔ پوتن کا یہ دورہ وزیراعظم نریندر مودی کی دعوت پر ہو رہا ہے۔

وزیراعظم مودی پوتن کی آمد پر نجی ڈنر کا بھی اہتمام کریں گے۔

۔5 دسمبر کو پوتن کے لیے راشٹرپتی بھون میں سرکاری استقبالیہ اور تینوں افواج کی گارڈ آف آنر کا اہتمام کیا جائے گا، جس کے بعد وہ راج گھاٹ جا کر مہاتما گاندھی کے مزار پر خراج عقیدت پیش کریں گے۔ دونوں رہنما پہلے محدود دائرے میں ملاقات کریں گے، اس کے بعد وفود کی سطح پر بات چیت حیدرآباد ہاؤس میں ہوگی۔ متعدد معاہدے تجارت، معیشت، زرعی شعبے اور تعلیمی تعاون سے متعلق ہوں گے۔

وزارتِ خارجہ کے مطابق، یہ دورہ ہندوستان اور روس کی قیادت کو دو طرفہ تعلقات کا جائزہ لینے، "خصوصی اور مراعات یافتہ اسٹریٹجک شراکت داری" کو مضبوط بنانے کے لیے نئی سمت متعین کرنے اور خطے و دنیا کے اہم مسائل پر باہمی تبادلہ خیال کا موقع فراہم کرے گا۔

پوتن کے دورے سے قبل روس کے پہلے نائب وزیراعظم اور ہندوستان-روس بین الحکومتی کمیشن کے شریک چیئرمین ڈینس مانتوروف نے کہا کہ یہ دورہ "سالانہ اعلیٰ سطحی سربراہی ملاقاتوں کی روایت کی بحالی" ہے اور دونوں ممالک کے تعلقات کو مزید گہرا کرنے کی جانب ایک اہم قدم ہے۔ اس سے پہلے کریملن کے ترجمان دیمتری پیسکوف نے کہا تھا کہ اس دورے کے دوران ایس -400 طویل فاصلے کے میزائل سسٹم کی اضافی خریداری پر بھی بات ہوسکتی ہے۔

انہوں نے کہا کہ یہ اہم ایجنڈے میں شامل ہے۔ ہماری دفاعی صنعت بہترین کام کر رہی ہے۔ روسی اسلحہ ہندوستانی مسلح افواج میں 36 فیصد تک موجود ہے اور امید ہے کہ تعاون جاری رہے گا۔ روس امید کر رہا ہے کہ ایس یو -57 پانچویں نسل کا اسٹیلتھ فائٹر طیارہ بھی ہندوستان کے ساتھ تعاون کے ایجنڈے میں شامل ہوگا۔ پیسکوف نے کہا کہ ایس یو -57 دنیا کا بہترین طیارہ ہے۔ یہ بھی ایجنڈے پر ہوگا۔

انہوں نے دفاعی تعاون پر مزید کہا کہ ہمارا تعاون صرف خرید و فروخت تک محدود نہیں۔ مشہور برہموس میزائل اس کی مثال ہے، جس میں اعلیٰ ٹیکنالوجی کا تبادلہ بھی شامل ہے۔ ہم کئی جدید سسٹمز تیار کر رہے ہیں، اور ہم اپنے ہندوستانی دوستوں کے ساتھ یہ تجربات شیئر کرنے کے لیے تیار ہیں۔ کریملن کے ترجمان نے یہ بھی کہا کہ ہندوستان اور روس کے درمیان جوہری توانائی کے شعبے میں کسی نئے معاہدے کا امکان موجود ہے۔

دونوں رہنماؤں کی آخری بالمشافہ ملاقات یکم ستمبر 2025 کو تیانجن، چین میں ایس سی او اجلاس کے موقع پر ہوئی تھی۔ پوتن کا یہ دورہ ہندوستان-روس اسٹریٹجک پارٹنرشپ کے 25 سال مکمل ہونے کے موقع پر ہو رہا ہے، جو اکتوبر 2000 میں قائم ہوئی تھی۔ دسمبر 2010 میں اسے "خصوصی اور مراعات یافتہ اسٹریٹجک پارٹنرشپ" کا درجہ دیا گیا تھا۔ تجارت اور اقتصادی تعلقات کو بڑھانا دونوں ممالک کی ترجیح ہے، اور 2030 تک دو طرفہ تجارت کو 100 ارب ڈالر تک لے جانے کا ہدف مقرر کیا گیا ہے۔ 2024–25 میں دونوں ممالک کی تجارت 68.7 ارب ڈالر کی ریکارڈ سطح تک پہنچ گئی۔

پوتن کے ہمراہ روسی وفد میں وزیر دفاع آندرے بیلوسوف سمیت متعدد وزراء شامل ہیں۔