نئی دہلی: آر ایس ایس (راشٹریہ سویم سیوک سنگھ) کے سربراہ موہن بھاگوت نے کہا کہ ایس ایس کا مقصد ہندو سماج کو اقتدار کے لیے نہیں بلکہ قوم کے وقار کے لیے منظم کرنا ہے، اور ہندو بھارت کے ذمہ دار ہیں۔ انہوں نے کہا کہ بھارت میں کوئی "غیر ہندو" نہیں ہے، کیونکہ سب ایک ہی آبا و اجداد کی اولاد ہیں اور ملک کی اصل تہذیب ہندو تہذیب ہے۔

بھاگوت نے یہ بات کرناٹک کے دارالحکومت بنگلورو میں "سنگھ کے 100 سال کی یاترا: نئے افق کے عنوان سے ایک لیکچر دیتے ہوئے کہی۔ اس موقع پر آر ایس ایس کے جنرل سیکریٹری دتاتریہ ہوسابولے اور مختلف شعبوں سے تعلق رکھنے والے افراد موجود تھے۔ آر ایس ایس کے سربراہ نے کہا: "جب سنگھ کے طور پر ایک منظم طاقت کھڑی ہوتی ہے تو اسے اقتدار کی خواہش نہیں ہوتی۔

وہ سماج میں غلبہ نہیں چاہتی بلکہ بھارت ماتا کی عظمت کے لیے خدمت اور سماج کو منظم کرنا چاہتی ہے۔ ہمارے ملک میں لوگوں کے لیے اس پر یقین کرنا مشکل تھا، لیکن اب وہ یقین کرتے ہیں۔" انہوں نے کہا کہ جب یہ سوال اٹھتا ہے کہ آر ایس ایس صرف ہندو سماج پر کیوں توجہ دیتی ہے تو اس کا جواب یہ ہے کہ ہندو ہی بھارت کے ذمہ دار ہیں۔ انہوں نے مزید کہا: "ایسا نہیں ہے کہ انگریزوں نے ہمیں قومیت دی۔ ہم ایک قدیم قوم ہیں۔ دنیا بھر میں یہ تسلیم کیا جاتا ہے کہ ہر قوم کی اپنی ایک بنیادی تہذیب ہوتی ہے۔ بھارت کی بنیادی تہذیب کیا ہے؟ جب ہم اس کا تجزیہ کرتے ہیں تو ہم 'ہندو' لفظ پر پہنچتے ہیں۔

" بھاگوت نے کہا: "بھارت میں دراصل کوئی غیر ہندو نہیں ہے۔ تمام مسلمان اور عیسائی بھی انہی آبا و اجداد کی اولاد ہیں۔ شاید وہ یہ بات جانتے نہیں یا بھول گئے ہیں۔" انہوں نے مزید کہا: "جان بوجھ کر یا انجانے میں، ہر کوئی بھارتی ثقافت پر عمل کرتا ہے، اس لیے کوئی غیر ہندو نہیں ہے۔ ہر ہندو کو یہ سمجھنا چاہیے کہ وہ ہندو ہے، کیونکہ ہندو ہونا بھارت کے لیے ذمہ دار ہونا ہے۔"

بھاگوت نے کہا: "سناتن دھرم ہی ہندو راشٹر ہے اور سناتن دھرم کی ترقی ہی بھارت کی ترقی ہے۔ آر ایس ایس کے لیے راستہ آسان نہیں رہا۔ تنظیم کو 60 سے 70 سالوں تک سخت مخالفت کا سامنا رہا، دو بار پابندی لگی اور کارکنوں پر پرتشدد حملے ہوئے۔" انہوں نے مزید کہا: "دو بار پابندی عائد کی گئی، تیسری بار بھی کی گئی لیکن وہ خاص مؤثر نہیں تھی۔

مخالفت ہوئی، تنقید ہوئی، رضاکاروں کو قتل کیا گیا۔ ہر طرح سے کوشش کی گئی کہ ہم ترقی نہ کر سکیں۔ لیکن رضاکار اپنی جان، وقت اور محنت سب کچھ سنگھ کو دیتے ہیں اور بدلے میں کچھ نہیں چاہتے۔ اسی بنیاد پر ہم نے تمام مشکلات پر قابو پایا اور آج ہمارے پاس سماج میں ایک اعتبار قائم ہے۔"

انہوں نے کہا کہ سنگھ کے صد سالہ موقع پر آر ایس ایس اپنی سرگرمیوں کو ملک کے ہر گاؤں، ہر طبقے، ہر ذات اور ہر برادری تک پہنچانا چاہتی ہے۔