نئی دہلی: مرکزی وزیر برائے پارلیمانی امور کیرن ریجیجو نے پیر کے روز عام آدمی پارٹی (آپ) کے سات اراکینِ پارلیمنٹ کو بھارتیہ جنتا پارٹی (بی جے پی) میں خوش آمدید کہا، جب راجیہ سبھا کے چیئرمین سی پی رادھا کرشنن نے ان کے انضمام کی منظوری دے دی۔

وزیر اعظم نریندر مودی کی قیادت میں "قوم کی تعمیر" کے عمل کا حصہ قرار دیتے ہوئے، ریجیجو نے اپوزیشن کے INDIA اتحاد پر بھی تنقید کی اور اسے "ٹکڑے ٹکڑے INDI الائنس" کہا۔ سوشل میڈیا پلیٹ فارم X پر ایک پوسٹ میں ریجیجو نے کہا کہ راجیہ سبھا کے چیئرمین نے سات AAP اراکین کے بی جے پی میں انضمام کو قبول کر لیا ہے۔

اب راگھو چڈھا، سندیپ پاٹھک، اشوک مِتّل، ہربھجن سنگھ، سواتی مالیوال، راجندر گپتا اور وکرمجیت سنگھ ساہنی بی جے پی پارلیمانی پارٹی کے رکن ہیں۔ انہوں نے مزید کہا کہ کافی عرصے سے انہوں نے ان ساتوں اراکین کو غیر پارلیمانی زبان یا بد نظمی کا سہارا لیتے نہیں دیکھا، اور انہیں این ڈی اے میں خوش آمدید کہا۔ اس پیش رفت کے بعد راجیہ سبھا میں بی جے پی کی تعداد بڑھ کر 113 ہو گئی ہے، جبکہ عام آدمی پارٹی کو بڑا جھٹکا لگا ہے کیونکہ اس کے اراکین کی تعداد کم ہو کر صرف تین رہ گئی ہے۔

جمعہ کے روز راگھو چڈھا، سندیپ پاٹھک اور اشوک مِتّل نے AAP سے علیحدگی اختیار کر کے بی جے پی میں شمولیت اختیار کی، جبکہ ہربھجن سنگھ، راجندر گپتا، وکرمجیت سنگھ ساہنی اور سواتی مالیوال بھی بعد میں بی جے پی میں شامل ہو گئے۔ ادھر AAP کے رکن پارلیمنٹ سنجے سنگھ نے باضابطہ طور پر چیئرمین راجیہ سبھا کو درخواست دی تھی کہ ان سات اراکین کو نااہل قرار دیا جائے۔

درخواست میں آئین کے دسویں شیڈول کی شق 4 کے تحت کیے گئے اس "مبینہ انضمام" کو چیلنج کیا گیا اور شق 2(1)(a) کے تحت نااہلی کا مطالبہ کیا گیا۔ تاہم، دسویں شیڈول کے مطابق اگر کسی سیاسی جماعت کے دو تہائی اراکین کسی دوسری جماعت میں ضم ہو جائیں تو نااہلی لاگو نہیں ہوتی۔ چونکہ ان ساتوں اراکین نے بی جے پی میں شمولیت اختیار کی، اس لیے یہ شرط پوری ہو گئی۔ اس اقدام پر جہاں بی جے پی کی جانب سے خیر مقدم کیا گیا، وہیں AAP رہنماؤں نے اسے "غداری" قرار دیتے ہوئے سخت ردعمل ظاہر کیا۔