بنگلورو 

بنگلورو کے گریمی ایوارڈ یافتہ موسیقار اور پدم شری اعزاز سے سرفراز رکی کیج نے بنگلورو میں منعقدہ ایک مباحثے کے دوران ’’ایک ملک، ایک انتخاب‘‘ کی تجویز پر اپنے خیالات کا اظہار کیا۔

آئین (129واں ترمیمی) بل، 2024 اور مرکز کے زیرِ انتظام علاقوں کے قانون (ترمیمی) بل، 2024 سے متعلق قائم مشترکہ پارلیمانی کمیٹی نے اس موضوع پر ایک مشاورتی اجلاس منعقد کیا، جس میں کمیٹی کے چیئرمین پی۔ پی۔ چودھری نے پدم ایوارڈ یافتگان اور ذرائع ابلاغ کے نمائندوں کے ساتھ تبادلۂ خیال کیا۔اے این آئی سے گفتگو کرتے ہوئے رکی کیج نے کہا کہ انہیں اس مشاورتی اجلاس میں مدعو کیے جانے پر ’’بہت فخر اور خوشی‘‘ محسوس ہوئی۔

انہوں نے اس بات پر بھی روشنی ڈالی کہ ایک ساتھ انتخابات کرانے سے اخراجات میں کمی آ سکتی ہے اور ملک میں بار بار ضابطۂ اخلاق نافذ کرنے کی ضرورت سے بچا جا سکتا ہے۔رکی کیج نے اے این آئی سے کہا  کہ مجھے بے حد خوشی ہے کہ مجھے ’ایک ملک، ایک انتخاب‘ سے متعلق اس مشاورت کے لیے بلایا گیا ہے۔ اس نظام سے بنیادی ڈھانچے پر آنے والے اخراجات کم ہوں گے اور بار بار ضابطۂ اخلاق نافذ نہیں کرنا پڑے گا۔ ہمیں طویل مدتی حل پر زیادہ توجہ دینے کی ضرورت ہے اور میرا ماننا ہے کہ ہر چار یا پانچ برس میں ایک مرتبہ انتخابات کرانے سے اس مقصد میں مدد ملے گی۔

دریں اثنا، یہ اقدام ان تجاویز پر جامع اور شواہد پر مبنی غور و خوض کے عمل کے لیے پارلیمان کے عزم کو ظاہر کرتا ہے، جن کے ہندوستان کے آئینی ڈھانچے، انتخابی نظام اور حکمرانی کے طریقۂ کار پر دور رس اثرات مرتب ہو سکتے ہیں۔اس دورے کے دوران کمیٹی نے مختلف فریقوں کے ساتھ بھی تبادلۂ خیال کیا، جن میں آئینی ادارے، منتخب نمائندے، سیاسی جماعتیں بشمول علاقائی پارٹیاں، قانونی ماہرین، انتظامی ادارے، مالیاتی و تعلیمی تنظیمیں، صنعتی اور پیشہ ورانہ انجمنیں، اور سول سوسائٹی کے نمائندے شامل تھے۔