نئی دہلی: جموں و کشمیر نیشنل کانفرنس (این سی) کے رہنما اور رکن اسمبلی حسنین مسعودی نے پیر کے روز قومی دارالحکومت میں احتجاج کی قیادت کرتے ہوئے مرکزی حکومت سے جموں و کشمیر کو ریاستی درجہ بحال کرنے کا وعدہ پورا کرنے کا مطالبہ کیا۔
حسنین مسعودی نے کہا کہ ریاستی درجہ بحال کرنے میں مسلسل تاخیر قومی مفاد کے خلاف ہے اور اسی غیر یقینی صورتحال کے سبب احتجاج کیا جا رہا ہے۔ انہوں نے کہا، "جموں و کشمیر کو ریاستی درجہ بحال کرنے کا وعدہ پارلیمنٹ کے اندر اور سپریم کورٹ کے سامنے کیا گیا تھا، لیکن ڈیڑھ سال گزرنے کے باوجود اس پر کوئی عمل نہیں ہوا۔
ہم نے ایک سال تک صبر کیا، مگر اب یہ غیر یقینی صورتحال نہ ملک کے مفاد میں ہے اور نہ ہی عوام کے۔ اسی لیے ہم احتجاج کے لیے یہاں آئے ہیں۔" اس سے قبل ہفتے کے روز جموں و کشمیر کے نائب وزیر اعلیٰ سریندر کمار چودھری نے کہا تھا کہ 20 جولائی کو جنتر منتر پر نیشنل کانفرنس کا احتجاج مرکز کو اس کے وعدے کی یاد دلانے کے لیے ہے۔
Jammu & Kashmir National Conference MLAs are marching towards Jantar Mantar in New Delhi to protest and demand the restoration of full Statehood for Jammu & Kashmir. The protest is being led by JKNC President Dr. Farooq Abdullah, with JKPCC President Tariq Hameed Karra also… pic.twitter.com/2iigd99g5A
— Jasmine (@sharmajasmine01) July 20, 2026
انہوں نے کہا، "2024 کے انتخابات کے دوران وزیر اعظم اور وزیر داخلہ نے جموں و کشمیر کے عوام سے وعدہ کیا تھا کہ انتخابات کے بعد ریاستی درجہ بحال کر دیا جائے گا، لیکن اکیس ماہ گزرنے کے باوجود یہ وعدہ پورا نہیں کیا گیا۔" انہوں نے مزید بتایا کہ پارٹی کے اراکین اسمبلی کی میٹنگ میں فیصلہ کیا گیا کہ 20 جولائی کو جنتر منتر پر جمع ہو کر وزیر اعظم اور وزیر داخلہ کو ان کا وعدہ یاد دلایا جائے۔
۔ 20 جولائی کو نیشنل کانفرنس نے جموں و کشمیر کو مکمل ریاستی درجہ دینے کے مطالبے کے لیے جنتر منتر پر احتجاج کا اعلان کیا تھا۔ پارٹی صدر فاروق عبداللہ نے مختلف سیاسی جماعتوں کے 52 رہنماؤں کو بھی احتجاج میں شرکت کی دعوت دی تھی۔
اس سے قبل 10 جولائی کو وزیر اعلیٰ عمر عبداللہ نے کہا تھا کہ پارٹی کو 20 جولائی کے احتجاج کی اجازت نہیں ملی۔ انہوں نے الزام لگایا تھا کہ نیشنل کانفرنس کے احتجاج کو ناکام بنانے کی کوشش کی جا رہی ہے۔ واضح رہے کہ اگست 2019 میں دفعہ 370 کی منسوخی کے بعد سے جموں و کشمیر کو مکمل ریاستی درجہ واپس دلانا نیشنل کانفرنس کا ایک اہم مطالبہ رہا ہے۔
