نئی دہلی: وزیراعلیٰ ریکھا گپتا نے جمعہ کے روز مشرقی ونود نگر ڈپو سے 200 الیکٹرک بسوں کو ہری جھنڈی دکھا کر روانہ کیا۔ اس موقع پر انہوں نے کہا کہ ان کی حکومت دہلی کے عوامی ٹرانسپورٹ کو مکمل طور پر الیکٹرک گاڑیوں (ای وی) میں تبدیل کرنے کے لیے مشن موڈ میں کام کر رہی ہے۔

وزیراعلیٰ نے تقریب میں بتایا کہ ان بسوں کے شامل ہونے کے بعد دہلی کے پبلک ٹرانسپورٹ فلیٹ میں شامل 6,300 بسوں میں سے الیکٹرک بسوں کی تعداد 4,550 ہو گئی ہے۔ انہوں نے دہلی-روہتک بین الریاستی بس سروس کو بھی ہری جھنڈی دکھائی اور مدن پور خادر بس ٹرمینل اور مشرقی ونود نگر ڈپو میں نئی عمارت کا افتتاح کیا۔ ریکھا گپتا نے کہا کہ ای-بسیں ترقی یافتہ دہلی کے ہدف کو حاصل کرنے میں مدد دیں گی اور فضائی آلودگی کے خلاف جنگ میں بھی اہم کردار ادا کریں گی۔

انہوں نے کہا کہ دہلی ٹرانسپورٹ کارپوریشن (ڈی ٹی سی) ہر ماہ نئی بسیں شامل کر رہی ہے اور نئے دفاتر کا افتتاح کیا جا رہا ہے۔ وزیراعلیٰ نے مزید کہا، "ہماری پوری حکومت دہلی میں بہتر سرکاری دفاتر کے لیے کام کر رہی ہے، جس سے آخرکار ایک بہتر شہر کی تعمیر میں مدد ملے گی۔

انہوں نے یہ بھی کہا کہ دہلی کی الیکٹرک وہیکل پالیسی ملک میں سب سے مؤثر پالیسیوں میں سے ایک ہے۔ ان کے مطابق قومی دارالحکومت کئی برسوں سے فضائی آلودگی کے مسئلے کا سامنا کر رہا ہے، لیکن سابق حکومتوں نے اس کے لیے کوئی مؤثر منصوبہ نہیں بنایا۔ انہوں نے ایکس (سابق ٹوئٹر) پر کہا کہ حکومت مشن موڈ میں دہلی کے پبلک ٹرانسپورٹ کو مکمل طور پر ای وی میں تبدیل کرنے پر کام کر رہی ہے۔ ان کے مطابق دہلی میں ای-بسوں کی تعداد 4500 سے تجاوز کر چکی ہے اور 2026 کے آخر تک اسے 7000 تک پہنچانے کا ہدف ہے۔