نئی دہلی

وزیرِ اعظم نریندر مودی نے ہفتہ کے روز سائنسی تجسس کی اہمیت کو اجاگر کرتے ہوئے کہا کہ یہی تجسس ہندوستان کی ترقی کو آگے بڑھانے میں بنیادی کردار ادا کرتا ہے۔ یہ بات انہوں نے رامن ایفیکٹ کی دریافت کی سالگرہ کے موقع پر کہی۔ یہ دن عظیم سائنس دان سی وی رامن کی علمی خدمات کو خراجِ عقیدت پیش کرنے کے لیے منایا جاتا ہے، جن کے کام نے عالمی سائنسی برادری میں ہندوستان کی مضبوط شناخت قائم کی۔

ایکس پر ایک پوسٹ میں وزیرِ اعظم نریندر مودی نے لکھا كہ آج قومی یومِ سائنس کے موقع پر ہم تحقیق، جدت اور سائنسی تجسس کے اس جذبے کا جشن منا رہے ہیں جو ہماری قوم کو آگے بڑھاتا ہے۔ یہ دن سر سی وی رامن کی جانب سے رامن ایفیکٹ کی انقلابی دریافت کی یاد دلاتا ہے، جس نے ہندوستانی تحقیق کو عالمی نقشے پر نمایاں مقام دلایا۔ ہم اپنے نوجوانوں کو بااختیار بنانے، تحقیقی نظام کو مضبوط کرنے اور قومی ترقی اور عالمی بھلائی کے لیے سائنس اور ٹیکنالوجی سے بھرپور استفادہ کرنے کے عزم کی تجدید کرتے ہیں۔

قومی یومِ سائنس ہر سال 28 فروری کو پورے ملک میں منایا جاتا ہے، جو طبیعیات دان سی وی رامن کی رامن ایفیکٹ کی دریافت کے اعزاز میں ہے۔ اسی دریافت پر انہیں 1930 میں طبیعیات کا نوبل انعام دیا گیا تھا۔ روشنی کے بکھراؤ (اسکیٹرنگ) کے مظہر پر مبنی یہ اثر وہ کارنامہ تھا جس نے ہندوستان کو طبیعیات میں پہلا اور مجموعی طور پر دوسرا نوبل انعام دلایا۔

رامن ایفیکٹ دراصل روشنی کی طولِ موج میں آنے والی وہ تبدیلی ہے جو کسی کیمیائی مرکب سے گزرتے ہوئے سالمے سے ٹکرانے کے نتیجے میں پیدا ہوتی ہے۔ روشنی کے اسی رامن ایفیکٹ کے باعث آسمان نیلا دکھائی دیتا ہے۔

قومی یومِ سائنس ہر سال ہندوستان میں ایک نمایاں سائنسی تہوار کے طور پر منایا جاتا ہے، جس کے دوران مختلف اسکولوں اور کالجوں کے طلبہ سائنس کے متنوع منصوبے پیش کرتے ہیں، جبکہ قومی اور ریاستی سائنسی ادارے اپنی تازہ ترین تحقیق کی نمائش کرتے ہیں۔

اس موقع کی یاد کو ہمیشہ زندہ رکھنے کے لیے، 28 فروری کو 1986 میں اُس وقت کی حکومت نے نیشنل کونسل فار سائنس اینڈ ٹیکنالوجی کمیونیکیشن (این سی ایس ٹی سی) کے ذریعے قومی یومِ سائنس قرار دیا۔ ہر سال این سی ایس ٹی سی اس دن کے لیے ایک نیا موضوع بھی اعلان کرتا ہے۔