نئی دہلی: سپریم کورٹ نے پیر کے روز اتر پردیش حکومت کی جانب سے ایودھیا کے رام مندر میں عطیات کی مبینہ خرد برد کی تحقیقات کے لیے تشکیل دی گئی خصوصی تحقیقاتی ٹیم (ایس آئی ٹی) کو معاملے میں اسٹیٹس رپورٹ پیش کرنے کی ہدایت دی ہے۔

چیف جسٹس سوریہ کانت، جسٹس جوئے مالیا باغچی اور جسٹس وی موہنا پر مشتمل بنچ نے شری رام جنم بھومی تیرتھ شیترا ٹرسٹ کو بھی نوٹس جاری کیا۔ عدالت نے یہ نوٹس ان درخواستوں پر جاری کیا جن میں عطیات کی مبینہ چوری کے معاملے کی منصفانہ اور مقررہ مدت کے اندر تحقیقات کرانے کا مطالبہ کیا گیا ہے۔

درخواست گزاروں میں سے ایک نریندر کمار گوسوامی نے معاملے کی سی بی آئی سے تحقیقات کرانے کی درخواست دی ہے۔ انہوں نے رام مندر کے انتظامی امور سنبھالنے والے شری رام جنم بھومی تیرتھ شیترا ٹرسٹ کے مالی معاملات کا کنٹرولر اینڈ آڈیٹر جنرل (سی اے جی) سے آڈٹ کرانے کا مطالبہ بھی کیا ہے۔

دوسری درخواست اجے کمار رائے اور دنیش کمار یادو نے دائر کی، جس میں بھی اسی نوعیت کی کارروائی کی اپیل کی گئی ہے۔ تیسری درخواست راشٹریہ جنتا دل (آر جے ڈی) کے رکن پارلیمنٹ سدھاکر سنگھ نے دائر کی، جس میں سپریم کورٹ کی نگرانی میں سی بی آئی تحقیقات کے ساتھ ساتھ ٹرسٹ کے تمام مالی معاملات کا فرانزک آڈٹ کرانے کی استدعا کی گئی ہے۔

اس سے قبل جسٹس بی وی ناگرتھنا کی سربراہی میں قائم جزوی ورکنگ ڈے بنچ نے ایک درخواست گزار کو ہدایت دی تھی کہ وہ فوری سماعت کے لیے بعد کی تاریخ پر مقدمے کا ذکر کرے۔ وکلاء اجے کمار رائے اور دنیش کمار یادو کی جانب سے دائر درخواست میں کہا گیا ہے کہ سی بی آئی کی قیادت میں ایک کثیر شعبہ جاتی خصوصی تحقیقاتی ٹیم تشکیل دی جائے، جو ٹرسٹ کے مالی معاملات میں مبینہ بے ضابطگیوں اور دیگر غیر قانونی سرگرمیوں کی تحقیقات کرے۔

درخواست میں مرکز، اتر پردیش حکومت اور ٹرسٹ کو ضروری ضابطہ جاتی، نگرانی اور آڈٹ کا مؤثر نظام قائم کرنے کی ہدایت دینے کی بھی استدعا کی گئی ہے تاکہ عوامی مفاد کا تحفظ ہو اور کروڑوں عقیدت مندوں اور عطیہ دہندگان کا اعتماد برقرار رہے۔

درخواست میں کہا گیا ہے کہ چاہے بعد میں عطیات کی مبینہ خرد برد اور دیگر بے ضابطگیوں کی خبریں درست ثابت ہوں یا نہ ہوں، ان اطلاعات نے ایودھیا کی عظمت کی بحالی کے لیے جدوجہد کرنے والی نسلوں میں شدید تشویش پیدا کی ہے۔ درخواست میں یہ بھی کہا گیا ہے کہ اتر پردیش حکومت کی تشکیل کردہ ایس آئی ٹی نے بغیر کسی ایف آئی آر یا باقاعدہ فوجداری مقدمہ درج کیے اپنی تحقیقات شروع کر دی ہیں، جبکہ معاملہ نہ صرف قابلِ دست اندازی جرم سے متعلق ہو سکتا ہے بلکہ اس کا براہِ راست تعلق بے شمار عقیدت مندوں کے مذہبی جذبات، اعتماد اور عوامی یقین سے بھی ہے۔

واضح رہے کہ اتر پردیش حکومت نے 13 جون کو رام مندر میں موصول ہونے والے عطیات میں مبینہ خرد برد کے الزامات کے بعد مندر ٹرسٹ کی درخواست پر ایس آئی ٹی تشکیل دی تھی۔ اس ٹیم میں لکھنؤ کے ڈویژنل کمشنر وجے وشواس پنت، انسپکٹر جنرل آف پولیس کرن ایس اور خصوصی سکریٹری (مالیات) نیل رتن شامل ہیں۔