نئی دہلی : کانگریس نے سونا ریفائننگ اور زیورات کی تیاری کے شعبے سے وابستہ کمپنی راجیش ایکسپورٹس لمیٹڈ (آر ای ایل) کے معاملے پر جمعہ کو سوال اٹھاتے ہوئے کہا کہ "15.15 لاکھ کروڑ روپے کے مبینہ گھوٹالے" کی ذمہ داری حکومت میں کون لے گا اور انفورسمنٹ ڈائریکٹوریٹ (ای ڈی) کب اپنی غفلت سے بیدار ہوگا؟

پارٹی کے محکمۂ میڈیا کے سربراہ پون کھیڑا نے کہا کہ حکومت اور سرمایہ بازار کے نگران ادارے سیبی نے اس معاملے پر مہینوں تک خاموشی اختیار کیے رکھی، جبکہ یہ معاملہ ایل آئی سی کے کروڑوں سرمایہ کاروں اور چھوٹے حصص یافتگان کے مفادات سے جڑا ہوا تھا۔

کھیڑا نے صحافیوں سے گفتگو کرتے ہوئے کہا، "3 جون 2026 کو سیبی کا حکم آیا کہ راجیش مہتا اور ان کی کمپنی کو ٹریڈنگ سے روک دیا گیا ہے، لیکن سوال یہ ہے کہ سیبی کو اس معاملے میں اصل میں کیا کرنا چاہیے تھا؟" انہوں نے کہا کہ ہندوستان میں فہرست بند کمپنیوں کے لیے بنائے گئے قواعد کے مطابق سیبی کو راجیش ایکسپورٹس سے مختلف معلومات طلب کرنی چاہیے تھیں۔

ان کا کہنا تھا، "سیبی کو راجیش ایکسپورٹس سے اس کے نقد بہاؤ (کیش فلو) کے بارے میں پوچھنا چاہیے تھا، لیکن ایسا نہیں کیا گیا۔ اس معاملے میں فارنسک آڈٹ جیسا قدم اٹھایا جانا چاہیے تھا، مگر سیبی شکایت موصول ہونے کے باوجود سات ماہ تک خاموش بیٹھی رہی۔" کھیڑا نے سوال کیا، "راجیش ایکسپورٹس نے پانچ برسوں میں 15.15 لاکھ کروڑ روپے کی آمدنی ظاہر کر دی، لیکن اس کے ریکارڈ بغیر کسی تصدیق کے قبول کر لیے گئے۔

آخر یہ کس کے کہنے پر کیا گیا؟" انہوں نے کہا کہ ای ڈی، سی بی آئی، سیبی اور ایس ایف آئی او جیسی ایجنسیاں اس دوران کیا کر رہی تھیں؟ کانگریس رہنما نے یہ سوال بھی اٹھایا، "کیا مودی حکومت کو اس بات کا علم نہیں تھا کہ اتنا بڑا مبینہ گھوٹالا ہو رہا ہے؟ اگر علم تھا تو کس کو بچایا جا رہا تھا؟ اس مبینہ گھوٹالے، سرمایہ کاروں کے نقصان اور ایل آئی سی کے ساتھ ہونے والی دھوکہ دہی کی ذمہ داری کون لے گا؟ نریندر مودی یا نرملا سیتا رمن؟"