نئی دہلی: راجستھان کے بیشتر حصوں میں آنے والے دنوں میں درجہ حرارت میں اضافے کا امکان ہے۔ محکمۂ موسمیات نے ہفتے کے روز یہ اطلاع دی۔ محکمہ کے مطابق ریاست کے زیادہ تر علاقوں میں آئندہ دنوں کے دوران کم سے کم اور زیادہ سے زیادہ درجہ حرارت میں 2 سے 3 ڈگری سیلسیس تک اضافہ ہونے کا امکان ہے۔ ساتھ ہی مغربی راجستھان کے کچھ حصوں میں اگلے 5 سے 6 دن تک ہیٹ ویو (لو) چلنے کے قوی امکانات ہیں۔

محکمہ نے بتایا کہ ہفتے کے روز کوٹا اور اودے پور ڈویژن میں کہیں کہیں گرج چمک کے ساتھ آندھی اور بارش ہو سکتی ہے۔ ایک نئے مغربی ڈسٹربنس کے اثر کے باعث 11 اور 12 مئی کو بیکانیر ڈویژن، شیکاواتی خطے اور جے پور و بھرت پور ڈویژن کے شمالی حصوں میں کہیں کہیں آندھی اور ہلکی بارش کا امکان ہے، جبکہ باقی بیشتر علاقوں میں موسم عام طور پر خشک رہے گا۔

محکمۂ موسمیات کے مطابق ہفتے کی صبح تک گزشتہ 24 گھنٹوں کے دوران ریاست کے کچھ حصوں میں آندھی کے ساتھ ہلکی بارش بھی ہوئی۔ سب سے زیادہ 5 ملی میٹر بارش ناگور ضلع کے میڑتا میں ریکارڈ کی گئی جبکہ زیادہ سے زیادہ درجہ حرارت پھلودی میں 44.8 ڈگری سیلسیس تک پہنچ گیا۔