شملہ

ہماچل پردیش کے مختلف علاقوں میں تازہ بارش، ژالہ باری اور برف باری کے باعث درجۂ حرارت میں نمایاں کمی آئی ہے، جس سے ریاست میں سیاحت اور زراعت کے شعبوں کو راحت ملی ہے۔ محکمۂ موسمیات  نے آنے والے دنوں میں مزید بارش اور گرج چمک کے امکانات ظاہر کیے ہیں۔ پیر کو شملہ میں اے این آئی سے گفتگو کرتے ہوئے شوبھت کتیار نے بتایا کہ گزشتہ 24 گھنٹوں کے دوران ریاست کے تقریباً تمام اضلاع میں بارش اور برف باری ریکارڈ کی گئی۔

انہوں نے کہا كہ گزشتہ 24 گھنٹوں میں ہماچل پردیش کے تقریباً تمام اضلاع میں بارش اور برف باری ہوئی ہے۔ نشیبی اور درمیانی پہاڑی علاقوں میں ہلکی سے درمیانی بارش ریکارڈ کی گئی۔ شملہ ضلع میں تقریباً 29.5 ملی میٹر اور منڈی میں تقریباً 23 ملی میٹر بارش درج کی گئی۔

محکمۂ موسمیات کے صبح کے بلیٹن کے مطابق کئی مقامات پر قابلِ ذکر بارش ریکارڈ کی گئی، جن میں سلونی (32 ملی میٹر)، سرہان (29.5 ملی میٹر)، بھابا نگر (29 ملی میٹر)، رام پور (28 ملی میٹر)، کٹاؤلا (23.4 ملی میٹر)، بھٹیات (23.1 ملی میٹر)، منالی (22 ملی میٹر) اور بھرماور (20.5 ملی میٹر) شامل ہیں۔

ریاست کے بالائی علاقوں میں بھی تازہ برف باری ہوئی۔ شملہ ضلع کے کھدرالا میں تقریباً 10.2 سینٹی میٹر برف باری ریکارڈ کی گئی، جبکہ کلپا میں 6.4 سینٹی میٹر، گوندھلا اور جوت میں تقریباً 3 سینٹی میٹر اور کوکوم سیری میں 1.5 سینٹی میٹر برف باری ہوئی۔شملہ، کفری، جبرہٹی، کانگڑا اور سندر نگر سمیت کئی علاقوں میں گرج چمک اور آسمانی بجلی کی سرگرمی دیکھی گئی، جبکہ شملہ ضلع میں ژالہ باری بھی ہوئی۔

شوبھت کتیار نے بتایا کہ اس موسمی سرگرمی کے باعث ریاست بھر میں درجۂ حرارت میں واضح کمی آئی ہے۔

انہوں نے کہا كہ گزشتہ 24 گھنٹوں کے دوران بیشتر مقامات پر کم سے کم درجۂ حرارت میں قابلِ ذکر کمی اور زیادہ سے زیادہ درجۂ حرارت میں واضح گراوٹ دیکھی گئی ہے۔ اس وقت کئی علاقوں میں درجۂ حرارت معمول سے قدرے کم ہے اور اگلے 24 گھنٹوں تک یہی صورتحال برقرار رہنے کا امکان ہے۔

محکمۂ موسمیات کے مطابق شملہ میں کم سے کم درجۂ حرارت 4.4 ڈگری سیلسیس اور زیادہ سے زیادہ 17.2 ڈگری سیلسیس ریکارڈ کیا گیا، جبکہ منالی میں کم سے کم درجۂ حرارت 2.9 ڈگری سیلسیس اور دھرم شالا میں 8.7 ڈگری سیلسیس رہا۔ ریاست کا سب سے کم درجۂ حرارت لہول اسپیتی کے تبو میں منفی 2.5 ڈگری سیلسیس ریکارڈ کیا گیا، جبکہ سب سے زیادہ درجۂ حرارت ناہن میں 28.7 ڈگری سیلسیس درج ہوا۔ شوبھت کتیار نے کہا کہ مغربی ہواؤں کے نظام (ویسٹرن ڈسٹربینس) کے اثر کے باعث آئندہ دنوں میں بھی موسم کی یہ سرگرمیاں جاری رہنے کا امکان ہے۔

انہوں نے بتایا كہ موجودہ موسمی نظام کا اثر ابھی ہماچل پردیش میں برقرار ہے اور چمبہ، کانگڑا، شملہ، منڈی اور کلو جیسے اضلاع میں گرج چمک کی سرگرمیاں جاری رہ سکتی ہیں۔ 17 مارچ کو اس میں کچھ کمی آ سکتی ہے، لیکن ایک نیا اور فعال مغربی موسمی نظام اس خطے کی طرف بڑھ رہا ہے۔

محکمۂ موسمیات کے مطابق نیا مغربی موسمی نظام 17 مارچ کی رات سے شمال مغربی ہندوستان کو متاثر کرے گا اور اس کے اثرات 18 سے 21 مارچ کے درمیان ہماچل پردیش میں دیکھے جا سکیں گے۔انہوں نے مزید کہا کہ 19 اور 20 مارچ کو ریاست کے کئی علاقوں میں ہلکی بارش اور گرج چمک کا امکان ہے، جبکہ بالائی علاقوں میں برف باری بھی ہو سکتی ہے۔محکمۂ موسمیات نے 18 اور 19 مارچ کے لیے اورنج الرٹ بھی جاری کیا ہے، جس میں شملہ، کلو، منڈی، کانگڑا اور سرمور اضلاع میں ژالہ باری اور گرج چمک کی پیش گوئی کی گئی ہے۔

شوبھت کتیار کے مطابق حالیہ بارش سے ریاست میں بارش کی کمی میں بھی بہتری آئی ہے۔ اس سے پہلے مارچ کے آغاز میں بارش کی کمی تقریباً 98 فیصد تک پہنچ گئی تھی، لیکن حالیہ بارش کے بعد صورتحال میں نمایاں بہتری آئی ہے اور آنے والے موسمی نظام کے ساتھ مزید بہتری کی امید ہے۔