نئی دہلی

کانگریس کے سابق صدر راہل گاندھی نے پٹرول اور ڈیزل کی قیمتوں میں ایک بار پھر اضافے کے بعد پیر کے روز الزام عائد کیا کہ ’’مہنگائی انسان‘‘ وزیر اعظم نریندر مودی انتخابات کے وقت وعدے کرتے ہیں اور باقی وقت عوام کی جیب پر حملہ کرتے ہیں۔

کانگریس صدر ملکارجن کھڑگے نے دعویٰ کیا کہ پٹرول اور ڈیزل کی قیمتوں میں حالیہ اضافہ مودی حکومت کی روزانہ کی جانے والی ’’ڈکیتی‘‘ ہے، جس کا بوجھ عام لوگوں کو اٹھانا پڑ رہا ہے۔پیر کے روز پٹرول اور ڈیزل کی قیمتوں میں ایک بار پھر اضافہ کیا گیا۔ پٹرول 2.61 روپے فی لیٹر جبکہ ڈیزل 2.71 روپے فی لیٹر مہنگا کر دیا گیا۔

گزشتہ دو ہفتوں سے بھی کم عرصے میں پٹرول اور ڈیزل کی قیمتوں میں یہ چوتھا اضافہ ہے۔دہلی میں پٹرول کی قیمت 99.51 روپے فی لیٹر سے بڑھا کر 102.12 روپے فی لیٹر کر دی گئی ہے، جبکہ ڈیزل 92.49 روپے فی لیٹر سے بڑھ کر 95.20 روپے فی لیٹر ہو گیا ہے۔لوک سبھا میں قائدِ حزبِ اختلاف راہل گاندھی نے ایکس پر پوسٹ کرتے ہوئے کہا کہ مہنگائی انسان مودی کا ایک اور حملہ۔ پٹرول اور ڈیزل کی قیمتیں قسطوں میں بڑھائی جاتی ہیں تاکہ خاموشی سے آپ کی جیب کاٹی جاتی رہے۔

انہوں نے کہا کہ میں کئی مہینوں سے آنے والے معاشی طوفان کی بات کر رہا تھا، لیکن مودی جی ہمیشہ کی طرح انتخابات میں مصروف تھے۔ انتخابات ختم ہوتے ہی پٹرول اور ڈیزل تقریباً آٹھ روپے مہنگا کر دیا گیا۔ یہ اضافہ مزید بھی جاری رہے گا۔

راہل گاندھی نے دعویٰ کیا کہ ’’مہنگائی انسان‘‘ مودی کا ایک ہی کام ہے، انتخابات میں وعدے کرنا اور باقی وقت عوام کی جیب پر وار کرنا۔دوسری جانب ملکارجن کھڑگے نے ایکس پر اپنی پوسٹ میں کہا کہ ایندھن کی لوٹ مار کا روزانہ حملہ ابھی ختم نہیں ہوا۔ پٹرول اور ڈیزل کی قیمتوں میں 10 دن کے اندر چوتھی بار اضافہ کیا گیا ہے۔ پٹرول 7.35 روپے فی لیٹر اور ڈیزل 7.53 روپے فی لیٹر مہنگا ہو چکا ہے۔

انہوں نے الزام لگایا کہ مودی حکومت نے عام لوگوں کی جمع پونجی کو جلانے کے لیے پٹرول چھڑک دیا ہے۔کانگریس صدر نے مزید کہا کہ 2004 سے 2014 کے درمیان متحدہ ترقی پسند اتحاد (یو پی اے) کی حکومت کے دوران عالمی سطح پر خام تیل کی قیمتوں میں 175.34 فیصد اضافہ ہوا تھا، جبکہ مودی حکومت کے دور میں بین الاقوامی خام تیل کی قیمتوں میں ایک فیصد بھی اضافہ نہیں ہوا۔

انہوں نے دعویٰ کیا کہ اس کے باوجود مودی حکومت کے دور میں پٹرول کی قیمت 2014 میں 71.41 روپے فی لیٹر سے بڑھ کر 2026 میں 102.12 روپے فی لیٹر ہو گئی، جو 43.01 فیصد اضافہ ہے۔ اسی طرح ڈیزل کی قیمت 56.71 روپے فی لیٹر سے بڑھ کر 95.20 روپے فی لیٹر ہو گئی، جو 67.87 فیصد اضافے کے برابر ہے۔