نئی دہلی: دہلی یونیورسٹی کی جانب سے طلبہ کو جنتر منتر پر ہونے والے احتجاج سے دور رہنے کی ہدایت کے بعد کانگریس رہنما راہل گاندھی نے جمعہ کے روز یونیورسٹی کو سخت تنقید کا نشانہ بنایا اور سوال کیا کہ طلبہ کو اپنے جمہوری حقوق استعمال کرنے پر "دھمکانے" کی ہمت کیسے ہوئی۔

راہل گاندھی نے دہلی یونیورسٹی کی سوشل میڈیا پوسٹ کو شیئر کرتے ہوئے لکھا، "آپ کو یاد رکھنا چاہیے کہ وقت آنے پر آپ ہی جوابدہ ہوں گے۔ طلبہ کو اپنے جمہوری حقوق استعمال کرنے پر دھمکانے کی ہمت آپ کی کیسے ہوئی؟"

راہل گاندھی کا یہ ردعمل یونیورسٹی کی جمعرات کی رات جاری کی گئی ہدایت کے بعد سامنے آیا، جس میں کہا گیا تھا کہ "عزیز طلبہ اور اساتذہ، آپ کی سلامتی ہمارے لیے اہم ہے۔ نئی دہلی کے جنتر منتر پر کسی بھی غیر قانونی اجتماع یا مظاہرے میں شرکت، جو سپریم کورٹ کی ہدایات کے مطابق سخت ضابطوں کے تحت ہیں، قانونی کارروائی کا سبب بن سکتی ہے۔"

یونیورسٹی نے مزید کہا کہ ایسی سرگرمیاں طلبہ کی ذاتی سلامتی کے لیے سنگین خطرہ بن سکتی ہیں اور ان کی تعلیمی پیش رفت اور پیشہ ورانہ مستقبل پر بھی منفی اثر ڈال سکتی ہیں۔ بیان میں طلبہ سے اپیل کی گئی کہ وہ جنتر منتر سے دور رہیں، اپنی سلامتی کو ترجیح دیں اور قانون کی پابندی کریں۔ یونیورسٹی نے یہ بھی خبردار کیا کہ موجودہ صورتحال کو ہوا دینے کے لیے بڑی مقدار میں جعلی اور گمراہ کن مواد سوشل میڈیا پر پھیلایا جا رہا ہے، اس لیے طلبہ احتیاط سے کام لیں۔