نئی دہلی

راہل گاندھی نے ‘ہندوستان اے آئی امپیکٹ سمٹ 2026’ کو محض پی آر (تشہیر) کا تماشہ قرار دیا ہے۔ کانگریس کے سابق صدر نے یہ الزام گلگوٹیا یونیورسٹی کی جانب سے ‘چینی روبوٹک ڈاگ’ کی نمائش کے بعد پیدا ہونے والے تنازع کے تناظر میں مرکزی حکومت پر عائد کیا۔

لوک سبھا میں قائدِ حزبِ اختلاف نے ایکس  پر پوسٹ کرتے ہوئے لکھا كہ ہندوستان کی صلاحیت اور ڈیٹا کے استعمال کے بجائے، اے آئی سمٹ بے ترتیبی کے ساتھ پی آر کا تماشہ بن کر رہ گئی ہے۔ ہندوستانی ڈیٹا فروخت کے لیے دستیاب ہے اور چینی مصنوعات کی نمائش کی جا رہی ہے۔

وہیں کانگریس نے ایک پوسٹ میں کہا كہ مودی حکومت نے ملک کی شبیہ کو ناقابلِ تلافی نقصان پہنچایا ہے۔ انہوں نے اے آئی کو مذاق بنا کر رکھ دیا ہے۔ یہ ایک ایسا شعبہ ہے جس میں ہم اپنی ڈیٹا پاور کی بنیاد پر دنیا کے رہنما بن سکتے ہیں۔

روبوٹ ڈاگ پر تنازع کیوں ہوا؟

قابلِ ذکر ہے کہ گلگوٹیا یونیورسٹی نے دہلی میں جاری ‘ہندوستان اے آئی امپیکٹ سمٹ 2026’ میں 350 کروڑ روپے کے اے آئی پروجیکٹ اور ایک ‘روبوٹک ڈاگ’ کی نمائش کی۔ خبروں کے مطابق ‘اوریان’ نامی یہ روبوٹ ایک چینی کمپنی نے تیار کیا تھا، جس کے باعث تنازع کھڑا ہو گیا۔ تنازع کے بعد گلگوٹیا یونیورسٹی کو فوری طور پر اپنا اسٹال خالی کرنے کے لیے کہا گیا۔ ذرائع کے مطابق یونیورسٹی کو فوراً نمائش گاہ چھوڑنے کی ہدایت دی گئی۔ ناقدین کا کہنا تھا کہ یہ یونیورسٹی کی دیسی اختراع نہیں بلکہ چین میں تیار کردہ روبوٹ ہے۔

اے آئی سمٹ چھوڑنے پر گلگوٹیا یونیورسٹی کا بیان

اس تنازع پر ردِعمل دیتے ہوئے گلگوٹیا یونیورسٹی کی پروفیسر نہا سنگھ نے کہا كہ یہ تنازع اس لیے پیدا ہوا کیونکہ شاید بات کو واضح طور پر پیش نہیں کیا گیا اور اس کے پیچھے کی نیت کو صحیح طرح سمجھا نہیں گیا۔

انہوں نے مزید کہا كہ ‘روبوٹ ڈاگ’ کے بارے میں ہم یہ دعویٰ نہیں کر سکتے کہ ہم نے اسے بنایا ہے۔ میں نے سب کو بتایا ہے کہ ہم نے اسے اپنے طلبہ کے سامنے اس لیے پیش کیا تاکہ وہ خود اس سے بہتر کچھ بنانے کی ترغیب حاصل کریں۔ ہمارا یونیورسٹی مصنوعی ذہانت (اے آئی) کے شعبے میں جدید ٹیکنالوجی فراہم کر کے مستقبل کے ماہرین تیار کرنے میں کردار ادا کرتی ہے اور آئندہ بھی یہ سلسلہ جاری رکھے گی۔

حکومت کی جانب سے یونیورسٹی کو نمائش کا علاقہ خالی کرنے کے لیے کہے جانے سے متعلق سوال پر انہوں نے کہا كہ مجھے اس بارے میں کوئی معلومات نہیں ہیں۔ مجھے بس اتنا معلوم ہے کہ آج ہم سب یہاں موجود ہیں۔

‘ہندوستان اے آئی امپیکٹ سمٹ’ کا انعقاد 16 سے 20 فروری تک قومی دارالحکومت میں کیا جا رہا ہے۔ 16 فروری سے شروع ہونے والی اس سمٹ میں دنیا بھر کے ٹیک ماہرین شریک ہو رہے ہیں۔ وزیرِ اعظم نریندر مودی نے پہلے دن اس سمٹ کا افتتاح کیا تھا، لیکن دوسرے دن، 17 فروری کو گلگوٹیا یونیورسٹی کے اقدام کے باعث عالمی سطح پر ملک کو تنقید کا سامنا کرنا پڑا۔ اس کے بعد اب گلگوٹیا یونیورسٹی کو اے آئی سمٹ سے فوری طور پر اپنا اسٹال خالی کرنے کی ہدایت دی گئی ہے۔