نئی دہلی: لوک سبھا میں قائدِ حزبِ اختلاف اور کانگریس کے رکن پارلیمنٹ راہل گاندھی نے نیٹ (NEET) اور دیگر مسابقتی امتحانات کے مبینہ پرچہ لیک، طلبہ کے احتجاج اور تعلیمی نظام کے معاملے پر مرکزی حکومت کو شدید تنقید کا نشانہ بنایا۔ انہوں نے الزام لگایا کہ ملک کا تعلیمی نظام سنگین بحران کا شکار ہے اور طلبہ کی آواز سننے کے بجائے ان کے خلاف طاقت کا استعمال کیا جا رہا ہے۔

راہل گاندھی نے دعویٰ کیا، ’’جو پولیس اہلکار مجھے گھسیٹ کر لے جا رہے تھے، وہی میرے کان میں کہہ رہے تھے کہ اس حکومت کو ہٹائیے۔‘‘ انہوں نے مزید کہا، ’’ایک پولیس اہلکار نے کہا کہ وہ راجستھان سے ہے اور اس حکومت کو ہٹانا چاہیے۔ دوسرے، جو ہریانہ سے تھے، انہوں نے بھی یہی بات کہی۔ ہم صرف وردی پہنے ہوئے ہیں، سب کو حقیقت معلوم ہے۔

ان بے چاروں کو احکامات پر عمل کرنا پڑتا ہے، اسی لیے وہ ایسا کر رہے ہیں۔ دہلی میں جو کچھ ہوا، اس سے پولیس والے بھی خوش نہیں ہیں۔‘‘ راہل گاندھی نے کہا کہ سب سے بڑا سوال یہ ہے کہ طلبہ کا آخر قصور کیا ہے۔ ان کے مطابق، طلبہ پرامن انداز میں صرف ایک منصفانہ اور قابلِ اعتماد تعلیمی نظام کا مطالبہ کر رہے ہیں۔ انہوں نے کہا کہ طلبہ پہلے ہی شدید ذہنی دباؤ میں رہتے ہیں اور امتحان سے قبل پرچہ لیک ہونے کی اطلاعات ان کی برسوں کی محنت کو ضائع کر دیتی ہیں۔ ان کا یہ بھی کہنا تھا کہ اسی دباؤ کے باعث بعض طلبہ نے خودکشی تک کر لی۔

#WATCH | Delhi: On Union Minister Jitendra Singh reaching LKM during Congress' protest, Lok Sabha LoP and Congress MP Rahul Gandhi says, "Because in every government there comes a time when psychologically they collapse. The leadership collapses. So that has happened. The… pic.twitter.com/pVxdncms3U

— ANI (@ANI) July 22, 2026

راہل گاندھی نے دعویٰ کیا کہ ایک وقت میں دنیا کے بہترین تعلیمی نظاموں میں شمار ہونے والا بھارتی تعلیمی نظام آج اعتماد کے شدید بحران سے دوچار ہے۔ انہوں نے الزام لگایا کہ گزشتہ دس برسوں میں مختلف امتحانات کے پرچے 152 مرتبہ لیک ہوئے، یعنی اوسطاً ہر ماہ ایک بڑا واقعہ پیش آیا۔ ان کے مطابق، ہر پرچہ لیک کے بعد لاکھوں طلبہ کو دوبارہ امتحان کی تیاری کرنا پڑتی ہے، لیکن آج تک کسی بھی معاملے میں ذمہ دار افراد کو سزا نہیں ملی۔

انہوں نے سوال اٹھایا کہ اگر اتنے واقعات کے باوجود کوئی مجرم قرار نہیں پایا تو اس کا مطلب ہے کہ نظام میں سنگین خامیاں موجود ہیں۔ راہل گاندھی نے تین مطالبات بھی پیش کیے: مرکزی وزیرِ تعلیم دھرمیندر پردھان استعفیٰ دیں۔ طلبہ کے ساتھ مبینہ مارپیٹ اور بدسلوکی کرنے والوں کے خلاف سخت کارروائی کی جائے۔ وزیرِ اعظم نریندر مودی طلبہ کے ساتھ ہونے والے سلوک پر معافی مانگیں۔

انہوں نے کہا کہ مسابقتی امتحانات کی تیاری میں خاندانوں پر بھاری مالی بوجھ پڑتا ہے۔ ان کا دعویٰ تھا کہ ہر سال نیٹ امتحان کی تیاری اور اس سے متعلق اخراجات پر والدین تقریباً اتنی ہی رقم خرچ کرتے ہیں جتنی مرکزی حکومت پورے تعلیمی بجٹ پر خرچ کرتی ہے۔ ان کے مطابق، یہ صورتحال متوسط اور غریب خاندانوں کے لیے نہایت مشکل ہے، کیونکہ وہ اپنی محنت کی کمائی بچوں کی تعلیم پر خرچ کرتے ہیں اور بعد میں پرچہ لیک جیسے واقعات کی وجہ سے دوہری مشکلات کا سامنا کرتے ہیں۔