امرتسر
امرتسر دیہی پولیس نے آئی ایس آئی کی سرپرستی میں چلنے والے دہشت گردی اور سرحد پار اسلحہ اسمگلنگ کے ایک ماڈیول کا پردہ فاش کرتے ہوئے دو ملزمان کو گرفتار کر لیا ہے۔ اس بات کی اطلاع پنجاب کے ڈائریکٹر جنرل آف پولیس نے دی۔
پولیس کے مطابق ابتدائی تفتیش سے معلوم ہوا ہے کہ ملزمان سوشل میڈیا کے ذریعے بیرونِ ملک موجود ہینڈلرز کے رابطے میں تھے۔ یہ ماڈیول شدت پسندی کو فروغ دینے اور ہندوستان مخالف اور پولیس مخالف بیانیہ پھیلانے میں بھی ملوث تھا۔
پنجاب پولیس کے ڈی جی پی نے سوشل میڈیا پلیٹ فارم ایکس پر ایک پوسٹ میں کہا كہ تھانہ گھرنڈا، امرتسر دیہی میں ایف آئی آر درج کر لی گئی ہے۔ مزید تفتیش جاری ہے تاکہ آگے اور پیچھے کے روابط کا پتہ لگا کر پورے نیٹ ورک کو ختم کیا جا سکے۔ پنجاب پولیس دہشت گردی، غیر قانونی اسلحہ اسمگلنگ اور منظم جرائم کے خلاف زیرو ٹالرنس پالیسی پر قائم ہے۔"
پولیس نے اس ماڈیول سے ایک اے کے-47 رائفل دو میگزین اور 36 زندہ کارتوسوں کے ساتھ برآمد کی، جبکہ اس کے علاوہ گلاک 9 ملی میٹر کے تین جدید پستول بھی ضبط کیے گئے ہیں۔
اس سے قبل 22 فروری کو کاؤنٹر انٹیلی جنس جالندھر نے کاؤنٹر انٹیلی جنس ایس اے ایس نگر کے ساتھ مشترکہ کارروائی کرتے ہوئے یکم جنوری 2026 کو ہماچل پردیش کے نالاگرھ پولیس اسٹیشن میں ہونے والے آئی ای ڈی (آر ڈی ایکس) دھماکے میں ملوث دو اہم ملزمان کو گرفتار کیا تھا۔
پولیس کے بیان کے مطابق گرفتار ملزمان کی شناخت مہاویر عرف کاکا اور منپریت عرف منی کے طور پر ہوئی ہے، جو دونوں پنجاب کے ایس بی ایس نگر کے رہنے والے ہیں۔ کارروائی کے دوران ان کے قبضے سے 9 ملی میٹر گلاک پستول اور زندہ کارتوس بھی برآمد کیے گئے۔
ابتدائی تحقیقات سے معلوم ہوا ہے کہ یہ ملزمان بیرونِ ملک بیٹھے ماسٹر مائنڈز گوپی نواشہریا اور جسی کولم کی ہدایات پر کام کر رہے تھے، جو کالعدم دہشت گرد تنظیم ببر خالصہ انٹرنیشنل سے وابستہ بتائے جاتے ہیں۔
مزید تفتیش سے یہ بھی سامنے آیا ہے کہ ملزمان نے اپنے ساتھیوں کے ساتھ مل کر بیرونِ ملک ہینڈلرز کی ہدایات پر آئی ای ڈی (آر ڈی ایکس) اور ہینڈ گرینیڈز پر مشتمل کھیپ حاصل کی تھی۔ انہی کھیپوں میں سے ایک آئی ای ڈی (آر ڈی ایکس) کا استعمال نالاگرھ پولیس اسٹیشن میں دھماکہ کرنے کے لیے کیا گیا تھا۔
.gif)
