موہالی
پنجاب کے ضلع ایس اے ایس نگر، موہالی میں آج صبح تقریباً 7:30 بجے کئی معروف اسکولوں کو دھمکی آمیز ای میل موصول ہوئیں۔ حکام نے فوری طور پر متاثرہ اسکولوں کو گھیرے میں لے لیا، طلبہ اور عملے کے لیے چھٹی کا اعلان کیا اور مکمل تلاشی کے لیے بم ڈسپوزل، اینٹی سبوتاژ اور اے آر پی ٹیمیں تعینات کر دیں۔ ایس پی سٹی موہالی دلپریت سنگھ نے جاری آپریشن کی تصدیق کرتے ہوئے بتایا کہ تاحال کوئی مشتبہ چیز برآمد نہیں ہوئی ہے۔
دلپریت سنگھ نے کہا كہ آج صبح تقریباً 7:30 بجے موہالی کے تین معروف اسکولوں کو دھمکی آمیز ای میلز موصول ہوئیں۔ اس کے بعد ہماری مختلف خصوصی ٹیموں نے فوری کارروائی کی۔ ہماری بم ڈسپوزل اسکواڈز، اے آر پی (آرمڈ ریسپانس پولیس) ٹیمیں، اینٹی سبوتاژ ٹیمیں اور مقامی پولیس فورس اس وقت موقع پر موجود ہیں۔ ہمارے تمام گزٹیڈ افسران ، ڈی ایس پیز اور ایس پیز میدان میں ہیں اور مکمل تلاشی لے رہے ہیں۔
انہوں نے مزید کہا كہ احتیاطی تدبیر کے طور پر ہم نے ان اسکولوں کو گھیرے میں لے لیا ہے اور طلبہ و اساتذہ کے لیے چھٹی کا اعلان کیا ہے۔ گھیرے میں لیے گئے علاقوں میں اس وقت تلاشی جاری ہے۔ اگر کوئی مشتبہ چیز یا ٹھوس شواہد سامنے آئے تو ہم آپ کو آگاہ کریں گے۔ اب تک کوئی مشتبہ شے نہیں ملی۔ جب ای میلز کے ماخذ یا ان کے ملکِ آغاز کے بارے میں سوال کیا گیا تو دلپریت سنگھ نے بتایا کہ اس حوالے سے تکنیکی تحقیقات جاری ہیں۔
انہوں نے کہا كہ ہمیں یہ ای میلز صبح تقریباً 7:30 بجے موصول ہوئیں اور ہم تمام تفصیلات کی تصدیق کے عمل میں ہیں۔ فی الحال کوئی مشتبہ چیز سامنے نہیں آئی ہے۔ آپ کے ذریعے میں عوام سے اپیل کرتا ہوں کہ خوف یا گھبراہٹ کا شکار نہ ہوں۔ تاہم، کسی بھی جانی یا مالی نقصان سے بچنے کے لیے ہم اس معاملے کو انتہائی سنجیدگی سے لے رہے ہیں اور نہایت باریک بینی سے تحقیقات کر رہے ہیں۔
اس سے قبل پیر کی صبح دارالحکومت دہلی میں نو اسکولوں کو بم دھماکے کی دھمکی آمیز ای میلز موصول ہوئیں، دہلی پولیس کے مطابق یہ دھمکیاں صبح 8:30 بجے سے 9:00 بجے کے درمیان موصول ہوئیں۔ ان اطلاعات کے بعد دہلی پولیس، فائر بریگیڈ کی ٹیموں اور بم ڈسپوزل اسکواڈز کو فوری طور پر متاثرہ اسکولوں میں تعینات کر دیا گیا۔
