چندی گڑھ
ایک اہم پالیسی تبدیلی کے تحت پنجاب حکومت نے بورڈ امتحانات میں تاریخِ پیدائش کی بنیاد پر ٹائی بریکر (برابری کی صورت میں فیصلہ کرنے) کا نظام ختم کرنے کا اعلان کیا ہے، تاکہ یکساں نمبر حاصل کرنے والے طلبہ کے ساتھ مساوی سلوک یقینی بنایا جا سکے۔یہ فیصلہ طلبہ کی جانب سے وزیر اعلیٰ بھگونت مان کو براہِ راست دی گئی تجاویز اور شکایات کے بعد کیا گیا ہے، جسے طلبہ برادری کے مسائل کے تئیں حکومت کے مثبت اور جوابدہ رویے کے طور پر دیکھا جا رہا ہے۔
صوبائی وزیر تعلیم ہرجوت بینس نے اس پیش رفت کی تصدیق کرتے ہوئے کہا کہ آئندہ سے جو طلبہ برابر نمبر حاصل کریں گے، انہیں ایک ہی درجہ (رینک) دیا جائے گا۔ اس اقدام کا مقصد سابقہ نظام میں موجود اس مبینہ ناانصافی کا خاتمہ کرنا ہے، جس میں برابر نمبر آنے کی صورت میں عمر کو تعلیمی کارکردگی پر ترجیح دی جاتی تھی۔
رینکنگ کے نظام میں تبدیلی کے علاوہ وزیر تعلیم نے امتحانی نظام میں وسیع اصلاحات کا بھی اعلان کیا۔ انہوں نے کہا کہ بورڈ امتحانات کے سوالیہ پرچوں میں بنیادی تبدیلی کی جائے گی اور رٹنے والے نظامِ تعلیم سے دوری اختیار کی جائے گی۔ان کے مطابق مستقبل کے امتحانات میں ایسے سوالات شامل کیے جائیں گے جو طلبہ کی صلاحیت، تصوراتی فہم اور تجزیاتی مہارتوں کو جانچیں گے، نہ کہ صرف معلومات یاد رکھنے کی صلاحیت کو۔
تعلیمی دیانت داری کے اہم مسئلے پر بات کرتے ہوئے ہرجوت بینس نے کہا کہ حکومت نقل اور امتحانی بے ضابطگیوں کے خلاف سخت اقدامات نافذ کرے گی۔ انہوں نے امتحانات میں شفافیت برقرار رکھنے اور پرچے لیک ہونے جیسے واقعات کے مکمل خاتمے کے عزم کا اعادہ کیا۔
حال ہی میں پنجاب اسکولی تعلیم کے میدان میں ملک کی نمایاں کارکردگی دکھانے والی ریاستوں میں شامل ہوا ہے۔ نیتی آیوگ کی تعلیمی معیار رپورٹ 2026 کے مطابق، بنیادی تعلیمی اشاریوں میں پنجاب نے کئی اہم شعبوں میں کیرالہ کو پیچھے چھوڑ دیا ہے۔
وزیر تعلیم ہرجوت سنگھ بینس نے اس کامیابی کو ’’تعلیم میں پنجاب کے نئے دور‘‘ کا آغاز قرار دیتے ہوئے کہا کہ یہ کامیابی نظامی اصلاحات، بہتر بنیادی ڈھانچے اور اساتذہ، طلبہ و والدین کی مشترکہ محنت کا نتیجہ ہے۔
انہوں نے کہا کہ یہ کامیابی مسلسل پالیسیوں کے مؤثر نفاذ اور سرکاری اسکولوں کو مضبوط بنانے کے لیے اجتماعی کوششوں کی بدولت حاصل ہوئی ہے۔رپورٹ کے مطابق، تیسری جماعت کے طلبہ میں زبان کی مہارت کے شعبے میں پنجاب نے 82 فیصد اور ریاضی میں 78 فیصد کامیابی حاصل کی، جبکہ کیرالہ میں یہ شرح بالترتیب 75 فیصد اور 70 فیصد رہی۔
اسی طرح نویں جماعت کی ریاضی میں پنجاب نے 52 فیصد اسکور حاصل کیا، جبکہ کیرالہ کا اسکور 45 فیصد ریکارڈ کیا گیا۔
