ممبئی
مہاراشٹر کی نائب وزیرِ اعلیٰ اور نیشنلسٹ کانگریس پارٹی (این سی پی) کی رہنما سنیترہ پوار نے پیر کے روز بارامتی اسمبلی حلقے کے ضمنی انتخاب میں کامیابی حاصل کرنے کے بعد عوام کا شکریہ ادا کیا۔میڈیا سے گفتگو کرتے ہوئے انہوں نے کہا کہ عوام نے اپنے ووٹ کے ذریعے سابق نائب وزیرِ اعلیٰ اجیت پوار پر اپنے اعتماد، محبت اور ہمدردی کا اظہار کیا، جن کا اس سال جنوری میں بارامتی میں ایک طیارہ حادثے میں انتقال ہو گیا تھا۔
انہوں نے کہا کہ عوام نے اس ووٹنگ کے ذریعے دادا (اجیت پوار) کے لیے اپنا اعتماد، محبت اور ہمدردی ظاہر کی ہے۔انہوں نے مغربی بنگال، آسام اور پڈوچیری میں جاری ووٹوں کی گنتی کے دوران این ڈی اے کی جیت پر بھی اعتماد ظاہر کیا۔انہوں نے کہا کہ مغربی بنگال، آسام اور پڈوچیری میں این ڈی اے کی حکومتیں بن رہی ہیں۔
اس سے قبل دن میں سنیترہ پوار نے کہا تھا کہ بارامتی کے عوام نے اپنے ووٹ کے ذریعے جو اعتماد ظاہر کیا ہے، وہ مرحوم اجیت پوار کی مقدس یاد کے نام ہے۔ایکس پر ایک پوسٹ میں انہوں نے کہا کہ بارامتی اسمبلی ضمنی انتخاب کے نتائج کے اعلان نے اجیت پوار کی یادیں تازہ کر دیں، جس سے سب جذباتی ہو گئے۔ انہوں نے پارٹی کارکنوں اور حامیوں سے اپیل کی کہ فتح کی خوشی میں کوئی جلوس نہ نکالا جائے اور نہ ہی گلال اڑایا جائے۔
انہوں نے کہا کہ آئیے صبر و تحمل کا مظاہرہ کریں اور ان کے اصولوں کے مطابق اپنا رویہ رکھیں۔ایک پریس ریلیز کے مطابق، سنیترہ پوار نے بارامتی کے عوام کا تہہ دل سے شکریہ ادا کیا کہ انہوں نے انہیں سابق نائب وزیرِ اعلیٰ کے وژن کو حقیقت میں بدلنے کا موقع دیا۔
انہوں نے کہا، "یہ اختتام نہیں بلکہ عزم، جدوجہد اور ایک نئے بارامتی کی شروعات ہے۔
انہوں نے عوام کو یقین دلایا کہ وہ اجیت پوار کے خوابوں کے بارامتی کی تعمیر کے لیے پرعزم ہیں۔
آج کرناٹک، ناگالینڈ، گجرات اور مہاراشٹر میں بھی ووٹوں کی گنتی ہوئی، جہاں گزشتہ ماہ موجودہ ارکانِ اسمبلی کے انتقال کے بعد ضمنی انتخابات منعقد کیے گئے تھے۔بارامتی ضمنی انتخاب 23 اپریل کو منعقد ہوا تھا، جو اس سال کے آغاز میں اجیت پوار کی طیارہ حادثے میں موت کے بعد خالی ہوئی نشست پر کرایا گیا تھا۔
