نئی دہلی

کانگریس کے سینئر رہنما پرمود تیواری نے ہفتہ کے روز پٹرول اور ڈیزل کی قیمتوں میں حالیہ اضافے پر مرکزی حکومت کو شدید تنقید کا نشانہ بنایا۔ انہوں نے الزام لگایا کہ حکومت مہنگائی میں مزید اضافہ کر رہی ہے اور عوام پر اضافی مالی بوجھ ڈال رہی ہے۔

بھارتیہ جنتا پارٹی (بی جے پی) کی قیادت والی مرکزی حکومت پر حملہ کرتے ہوئے پرمود تیواری نے دعویٰ کیا کہ گزشتہ 10 دنوں میں پٹرول اور ڈیزل کی قیمتوں میں تین بار اضافہ کیا گیا ہے، جس سے فی لیٹر مجموعی طور پر 5 روپے کا اضافہ ہو چکا ہے۔

سوشل میڈیا پلیٹ فارم ایکس پر انہوں نے لکھا کہ عوام کی جیبوں پر ایک اور ضرب! 10 دنوں میں تیسری بار پٹرول اور ڈیزل مہنگا کر دیا گیا۔ 3 روپے + 1 روپیہ + 1 روپیہ = فی لیٹر مجموعی طور پر 5 روپے کا چونکا دینے والا اضافہ۔ اور صرف دو دن پہلے حکومت ایک اجلاس میں دعویٰ کر رہی تھی کہ سب کچھ قابو میں ہے۔

کانگریس رہنما نے 2014 کے لوک سبھا انتخابات سے قبل وزیر اعظم نریندر مودی کے ایندھن کی قیمتوں سے متعلق بیانات کا بھی حوالہ دیا۔

انہوں نے کہا کہ مودی جی، 2014 میں آپ کہا کرتے تھے کہ منموہن سنگھ نے مہنگائی بڑھا دی ہے، ہم اقتدار میں آکر پٹرول 30 روپے فی لیٹر کر دیں گے۔ آج پٹرول تقریباً 100 روپے فی لیٹر تک پہنچ چکا ہے۔ وعدہ 30 روپے کا تھا، لیکن ملا 100 روپے کا پٹرول!۔انہوں نے مزید الزام لگایا کہ ملک میں بڑھتی ہوئی مہنگائی اور ایندھن کی قیمتوں میں اضافے کی وجہ مرکز کی ناکام معاشی اور خارجہ پالیسیاں ہیں۔

پرمود تیواری نے کہا کہ یہ مہنگائی آپ کی ناقص خارجہ پالیسی اور ناکام معاشی پالیسیوں کا نتیجہ ہے۔ نجی کمپنیاں، جو آپ کے قریبی سرمایہ دار دوست ہیں، منافع کمانے کے لیے عام آدمی کو لوٹ رہی ہیں۔ یہ عوام کے ساتھ دن دہاڑے ڈکیتی کے مترادف ہے۔ مودی حکومت فوری طور پر قیمتوں میں اضافہ واپس لے۔

دریں اثنا، کانگریس کے قومی صدر ملکارجن کھرگے نے بھی پٹرول اور ڈیزل کی قیمتوں میں تازہ اضافے کے بعد مرکزی حکومت پر سخت تنقید کی اور الزام لگایا کہ حکومت قسطوں میں عوام کی کمائی لوٹ رہی ہے۔انہوں نے اپنی پوسٹ میں لکھا کہ پٹرول اب 100 روپے فی لیٹر سے تجاوز کر چکا ہے۔ اس بار عوام کی کمائی قسطوں میں لوٹی جا رہی ہے۔ پٹرول اور ڈیزل پر روزانہ ایک ہزار کروڑ روپے کے مرکزی ٹیکس کے باوجود بی جے پی کی بھوک ختم نہیں ہو رہی۔ جب عالمی منڈی میں قیمتیں کم تھیں تو اس کا فائدہ عوام کو نہیں دیا گیا، بلکہ مسلسل لوٹا گیا۔ اور جب بحران آیا تو حکومت انتخابات میں مصروف رہی، جبکہ انتخابات کے بعد عوام کو قربانی کا درس دیا جانے لگا۔

حکومت کے اس دعوے کی تردید کرتے ہوئے کہ ہندوستان میں ایندھن کی قیمتیں کئی دوسرے ممالک سے کم ہیں، ملکارجن کھرگے نے مختلف ممالک کی مثالیں پیش کیں جہاں مغربی ایشیا کے حالیہ توانائی بحران کے دوران حکومتوں نے عوام کو ریلیف فراہم کیا۔

انہوں نے کہا کہ اٹلی نے ایندھن پر عائد ایکسائز ڈیوٹی کم کرکے عوام کو ریلیف دیا۔آسٹریلیا نے ایکسائز ڈیوٹی میں کمی کرکے پٹرول کی قیمت تقریباً 17 روپے فی لیٹر کم کی۔

جرمنی نے تیل پر ٹیکس کم کیا، جس سے ایندھن کی قیمتوں میں 17 سے 19 روپے فی لیٹر تک کمی آئی۔برطانیہ نے گھریلو صارفین کو 100 پاؤنڈ کی توانائی امداد دی اور ایندھن و بجلی پر ٹیکس کم کیا۔

آئرلینڈ نے 250 ملین یورو کے امدادی پیکیج کے ذریعے پٹرول کی قیمت تقریباً 0.15 یورو فی لیٹر اور ڈیزل کی قیمت 0.20 یورو فی لیٹر کم کی۔

ادھر ہفتہ کے روز ملک کے بڑے شہروں میں پٹرول اور ڈیزل کی قیمتوں میں ایک بار پھر اضافہ کیا گیا، جو 10 دن سے بھی کم عرصے میں تیسرا اضافہ ہے۔ یہ اضافہ ایسے وقت میں کیا گیا ہے جب عالمی توانائی منڈیوں میں مسلسل اتار چڑھاؤ جاری ہے۔

ایندھن کی قیمتوں میں بار بار ہونے والا یہ اضافہ ایک ایسے وقت میں سامنے آیا ہے جب ایندھن کی بچت کی اپیل کی جا رہی ہے۔ مغربی ایشیا میں جاری تنازعے کے باعث دنیا توانائی کے بحران سے دوچار ہے، جبکہ اہم سمندری تجارتی گزرگاہ آبنائے ہرمز میں رکاوٹوں نے عالمی تیل کی رسد اور قیمتوں پر گہرا اثر ڈالا ہے۔