ممبئی: وزیرِ اعظم نریندر مودی نے فرانس کے صدر ایمانوئل میکرون کے ساتھ مشترکہ پریس کانفرنس میں کہا کہ فرانس بھارت کے قدیم ترین اسٹریٹجک شراکت داروں میں سے ایک ہے۔ انہوں نے کہا، آج ہم اپنے تعلقات کو ایک وسیع، عالمی اور اسٹریٹجک شراکت داری کی شکل دے رہے ہیں۔ یہ عالمی استحکام اور ترقی کی شراکت داری ہے۔

صدر میکرون کے ساتھ مل کر ہم نے اس اسٹریٹجک پارٹنرشپ کو بے مثال گہرائی اور توانائی دی ہے۔ وزیرِ اعظم مودی نے H-125 ہیلی کاپٹر کا ذکر کرتے ہوئے کہا، "ہمیں فخر ہے کہ بھارت اور فرانس مل کر دنیا کا پہلا ایسا ہیلی کاپٹر بھارت میں تیار کریں گے جو ماؤنٹ ایورسٹ کی بلندی تک پرواز کر سکے گا۔ ہم اسے پوری دنیا میں برآمد کریں گے۔

بھارت اور فرانس کے درمیان تعاون کی کوئی حد نہیں ہے۔ حال ہی میں ہم نے یورپی یونین کے ساتھ فری ٹریڈ ایگریمنٹ کیا ہے، جو بھارت اور فرانس کے تعلقات میں بھی نئی رفتار لائے گا۔ انہوں نے کہا، جدت تنہائی سے نہیں بلکہ تعاون سے جنم لیتی ہے۔ ہم ہر شعبے میں اپنی صنعت اور اختراعات کو یکجا کریں گے۔ ہم طلبہ اور محققین کے تبادلے کو مزید آسان بنائیں گے۔

#WATCH | Mumbai: Prime Minister Narendra Modi says, "With the launch of the India-France Year of Innovation, we are transforming our strategic partnership into a Partnership of the People. Because innovation doesn't happen in isolation, but through collaboration. Therefore, our… pic.twitter.com/v838sBUIN9

— ANI (@ANI) February 17, 2026

آج دنیا غیر یقینی حالات سے گزر رہی ہے، ایسے میں ہم انٹرنیشنل سولر الائنس اور IMEC کے ذریعے خوشحالی کو فروغ دیتے رہیں گے۔ مشترکہ پریس کانفرنس میں وزیرِ اعظم مودی نے دہشت گردی اور دنیا کے مختلف خطوں میں جاری تنازعات کی جانب اشارہ کرتے ہوئے کہا، یوکرین ہو، مغربی ایشیا ہو یا انڈو پیسیفک، ہم ہر خطے میں امن کی تمام کوششوں کی حمایت جاری رکھیں گے۔

دہشت گردی کے ہر روپ کو جڑ سے ختم کرنا ہماری مشترکہ وابستگی ہے۔ انہوں نے مزید کہا کہ جلد ہی فرانس میں سوامی وویکانند کلچر سینٹر قائم کیا جائے گا اور آج دونوں ممالک ایک نئے باب کا آغاز کر رہے ہیں۔ وزیرِ اعظم نے اعلان کیا کہ بھارت اور فرانس صحت کے شعبے میں مصنوعی ذہانت کے لیے انڈو-فرینچ سینٹر، ڈیجیٹل سائنس اینڈ ٹیکنالوجی کے لیے مشترکہ مرکز، اور ایئروناٹکس میں مہارت سازی کے لیے نیشنل سینٹر آف ایکسیلنس کا آغاز کریں گے۔ انہوں نے کہا،یہ مستقبل کی تعمیر کے پلیٹ فارم ہیں۔ آج جب دنیا غیر یقینی دور سے گزر رہی ہے، ایسے میں بھارت-فرانس شراکت داری عالمی استحکام کے لیے ایک مضبوط قوت ہے۔

#WATCH | Mumbai: French President Emmanuel Macron says, "I thank you for your warm welcome on my fourth official visit to India... The bilateral relationship between India and France is truly remarkable and unique. This relationship is one of trust, openness, and ambition. We… pic.twitter.com/QHL8Om874R

— ANI (@ANI) February 17, 2026

اس موقع پر فرانس کے صدر ایمانوئل میکرون نے کہا: میں اپنے چوتھے سرکاری دورۂ بھارت پر آپ کی پرتپاک میزبانی کے لیے شکریہ ادا کرتا ہوں۔ بھارت اور فرانس کے درمیان دوطرفہ تعلقات واقعی غیر معمولی اور منفرد ہیں۔ یہ رشتہ اعتماد، کشادگی اور بلند عزائم پر مبنی ہے۔ ہم نے آج اس شراکت داری کو ’خصوصی اسٹریٹجک پارٹنرشپ‘ کے درجے تک بلند کرنے کا بھی فیصلہ کیا ہے، جس سے اسے ایک نیا اسٹیٹس حاصل ہوگا۔ اس میں کوئی شک نہیں، کیونکہ ہمیں اس تعلق پر مکمل اعتماد ہے، اور گزشتہ آٹھ برسوں سے ہم اسی اعتماد کے ساتھ آگے بڑھ رہے ہیں۔

ہر سال مختلف شعبوں میں مل کر کام کرتے ہوئے ہم نے کئی نئے راستے کھولے ہیں۔ چاہے وہ انڈو پیسیفک خطہ ہو یا ٹیکنالوجی کا میدان، جہاں کسی کی بالادستی نہیں ہونی چاہیے۔ ہم قانون کی حکمرانی پر پختہ یقین رکھتے ہیں اور گزشتہ چند برسوں میں ہم نے اسے عملی طور پر ثابت بھی کیا ہے۔ چاہے وہ IMEC ہو جسے ہم نے مشترکہ طور پر شروع کیا، یا مصنوعی ذہانت اور انٹرنیشنل سولر الائنس جیسے اقدامات — گزشتہ آٹھ برسوں میں ہم نے کئی اہم پہل قدمیاں مل کر کی ہیں۔