گوہاٹی/ آواز دی وائس

وزیر اعظم نریندر مودی 13 اور 14 ستمبر کو آسام کا دورہ کرنے والے ہیں، جہاں وہ 18,000 کروڑ روپے کی لاگت والے منصوبوں کا افتتاح اور سنگِ بنیاد رکھیں گے۔ یہ اطلاع بدھ کے روز وزیر اعلیٰ ہیمنت بسوا سرما نے دی۔

وزیر اعظم 13 ستمبر کو گوہاٹی کے کھاناپارا میں ویٹرنری کالج گراؤنڈ میں بھارت رتن ڈاکٹر بھوپن ہزاریکا کی صد سالہ یومِ پیدائش تقریبات کے پروگرام میں بھی شرکت کریں گے۔ اس موقع پر ان کی یاد میں ایک یادگاری سکہ بھی جاری کیا جائے گا۔

وزیر اعلیٰ نے کہا کہ شام 5:15 بجے وہ ڈاکٹر بھوپن ہزاریکا کی صد سالہ تقریب میں شامل ہوں گے۔ یہ تقریب تقریباً ایک گھنٹہ 15 منٹ چلے گی اور اس کی خاص بات یہ ہوگی کہ 1200 سے زیادہ فنکار مل کر ڈاکٹر ہزاریکا کے 14 گانے 18 منٹ تک گائیں گے۔ اس پروگرام میں ہم ڈاکٹر بھوپن ہزاریکا کی ایک سوانح عمری بھی جاری کریں گے، جس کا ترجمہ ہندوستان کی تمام زبانوں میں کیا جائے گا۔ اس سوانح عمری کو آسام کے 20 لاکھ خاندانوں تک پہنچایا جائے گا۔ ریزرو بینک آف انڈیا نے ڈاکٹر بھوپن ہزاریکا کی تصویر والا سکہ تیار کیا ہے، جسے وزیر اعظم لانچ کریں گے۔

وزیر اعظم اس رات کو گوہاٹی کے اسٹیٹ گیسٹ ہاؤس نمبر 1 میں قیام کریں گے۔

اتوار کے روز، وزیر اعظم مودی میڈیکل کالجوں کا سنگِ بنیاد رکھیں گے۔ اس کے بعد وہ دریائے برہم پتر پر ایک نئے پل کا سنگِ بنیاد رکھیں گے۔

وزیر اعلیٰ نے بتایا کہ 14 ستمبر کو وزیر اعظم صبح 11 بجے منگلدئی پہنچیں گے اور وہ 567 کروڑ روپے کی لاگت سے درنگ میڈیکل کالج، نرسنگ کالج اور جی این ایم اسکول کا سنگِ بنیاد رکھیں گے۔ وہ برہم پتر پر نارنگی سے کرووا کو جوڑنے والے 1200 کروڑ روپے کے نئے پل کا بھی سنگِ بنیاد رکھیں گے۔ اس کے ساتھ ہی 4500 کروڑ روپے کی لاگت سے گوہاٹی رنگ روڈ کا سنگِ بنیاد رکھا جائے گا۔ 14 ستمبر کو دوپہر 2:30 بجے وہ نومالیگڑھ ریفائنری کا دورہ کریں گے اور ملک کی پہلی بانس پر مبنی بایو ریفائنری کا افتتاح کریں گے، جس کی لاگت 5000 کروڑ روپے ہے۔

وزیر اعلیٰ نے مزید کہا وہ 7000 کروڑ روپے کی لاگت سے ایک پولی پروپلین یونٹ کا بھی سنگِ بنیاد رکھیں گے۔ اس کے بعد وزیر اعظم جوروہاٹ ہوائی اڈے سے کولکاتا کے لیے روانہ ہو جائیں گے ۔

دریں اثنا، وزیر اعظم کے استقبال کے لیے ریاست بھر میں تیاریاں زور و شور سے جاری ہیں۔