نئی دہلی: وزیرِ اعظم نریندر مودی نے جمعہ کو وزراء کونسل کے حالیہ اجلاس کو “نتیجہ خیز” قرار دیتے ہوئے کہا کہ اس میں عوامی زندگی کو آسان بنانے، کاروبار میں سہولت پیدا کرنے اور “وکست بھارت” کے وژن کو تیز رفتاری سے آگے بڑھانے کے لیے اصلاحات پر تبادلۂ خیال کیا گیا۔

سوشل میڈیا پلیٹ فارم “ایکس” پر ایک پوسٹ میں نریندر مودی نے کہا کہ وزراء نے حکمرانی میں اصلاحات اور عوامی خدمات کی فراہمی سے متعلق خیالات، تجربات اور بہترین طریقوں کا تبادلہ کیا۔ مودی نے لکھا: “کل وزراء کونسل کا ایک نتیجہ خیز اجلاس ہوا۔ ہم نے عوامی زندگی میں آسانی، کاروباری سہولتوں میں اضافے اور وکست بھارت کے مشترکہ خواب کو حقیقت بنانے کے لیے اصلاحات پر مختلف نقطۂ نظر اور بہترین طریقوں کا تبادلہ کیا۔

” یہ اجلاس جمعرات کو نئی دہلی کے “سیوا تیرتھ” میں وزیرِ اعظم کی صدارت میں منعقد ہوا، جس میں مرکزی کابینہ کے وزراء، آزادانہ چارج رکھنے والے وزرائے مملکت اور دیگر وزرائے مملکت نے شرکت کی۔ بھارتیہ جنتا پارٹی کے ذرائع کے مطابق زراعت، جنگلات، محنت، سڑک ٹرانسپورٹ، کارپوریٹ امور، خارجہ امور، تجارت اور توانائی سمیت کئی اہم وزارتوں نے اجلاس میں اپنی پریزنٹیشن پیش کیں۔ اجلاس کے دوران وزیرِ اعظم نے تیز تر فیصلہ سازی اور مؤثر حکمرانی کی اہمیت پر زور دیا۔

انہوں نے وزارتوں سے کہا کہ فائلوں کی نقل و حرکت میں تیزی لائی جائے، تاخیر کم کی جائے اور کم وقت میں زیادہ پیداواری نتائج حاصل کیے جائیں۔ مودی نے حکمرانی میں سادگی اور اصلاحات کے عمل کو مزید مضبوط بنانے پر بھی زور دیا۔

حکومت کے طویل مدتی منصوبے کا اعادہ کرتے ہوئے مودی نے کہا کہ “وکست بھارت 2047” محض ایک نعرہ نہیں بلکہ حکومت کے عزم کی عکاسی کرتا ہے۔ داخلی جائزوں میں توقعات سے کم کارکردگی دکھانے والی وزارتوں کو اپنی خامیوں کو دور کرنے اور کارکردگی بہتر بنانے کی ہدایت دی گئی۔ وزیرِ اعظم نے وزراء پر زور دیا کہ وہ عوام سے زیادہ فعال رابطہ رکھیں اور گزشتہ 12 برسوں میں حکومت کی جانب سے کیے گئے اقدامات اور کامیابیوں کو لوگوں تک پہنچائیں۔