نئی دہلی

نریندر مودی 10 اور 11 مئی کو کرناٹک، تلنگانہ اور گجرات کا دورہ کریں گے۔ اس دوران وہ حیدرآباد میں تقریباً 9,400 کروڑ روپے کی مختلف منصوبوں کا افتتاح کریں گے اور سومناتھ مندر میں سومناتھ امرت مہوتسو میں بھی شرکت کریں گے۔دو سرکاری بیانات میں کہا گیا ہے کہ مودی بنگلورو میں آرٹ آف لیونگ کی 45ویں سالگرہ کی تقریب میں بھی شریک ہوں گے اور تلنگانہ میں کئی منصوبوں کا افتتاح اور سنگ بنیاد رکھیں گے۔

وزیر اعظم اتوار کی صبح بنگلورو میں سالگرہ کی تقریب میں شرکت کریں گے اور حاضرین سے خطاب کریں گے۔ وہ بنگلورو کے آرٹ آف لیونگ انٹرنیشنل سینٹر میں نئے تعمیر شدہ دھیان مندر کا افتتاح کریں گے، جو ذہنی سکون اور ہمہ جہتی فلاح کے لیے وقف ایک مراقبہ مرکز ہے۔

مودی آرٹ آف لیونگ کی ملک گیر خدمت مہمات کا آغاز بھی کریں گے، جن میں ذہنی صحت، دیہی ترقی، قدرتی تحفظ اور سماجی تبدیلی سے متعلق سال بھر جاری رہنے والے منصوبے شامل ہیں۔

اس کے بعد وہ حیدرآباد جائیں گے، جہاں تقریباً 9,400 کروڑ روپے مالیت کے کئی ترقیاتی منصوبوں کا سنگ بنیاد، افتتاح اور قوم کے نام وقف کریں گے۔وزیر اعظم اس موقع پر عوام سے خطاب بھی کریں گے اور اس کے بعد حیدرآباد میں واقع سندھو اسپتال کو قوم کے نام وقف کریں گے۔مودی قومی شاہراہ-167 کے تحت گڈے بیلور سے محبوب نگر تک سڑک کی توسیع سے متعلق منصوبے کا سنگ بنیاد رکھیں گے۔ یہ حیدرآباد-پنجی اقتصادی راہداری کا حصہ ہے اور اس منصوبے کی مجموعی لاگت 3,175 کروڑ روپے سے زیادہ ہے۔

اس منصوبے سے ٹریفک کی روانی اور حفاظت بہتر ہوگی، سفر کا وقت تقریباً ڈیڑھ گھنٹہ کم ہو جائے گا اور ایندھن کے استعمال کے ساتھ گاڑیوں کی دیکھ بھال کی لاگت میں بھی کمی آئے گی۔یہ شاہراہ تلنگانہ اور کرناٹک کے درمیان رابطے کو مضبوط کرے گی اور دونوں ریاستوں میں صنعتی ترقی کو فروغ دے گی۔

مودی سنگاریڈی ضلع میں ظہیرآباد انڈسٹریل ایریا کا سنگ بنیاد بھی رکھیں گے، جو حیدرآباد-ناگپور انڈسٹریل کوریڈور (ایچ این آئی سی) کے تحت قومی صنعتی راہداری ترقیاتی پروگرام کا حصہ ہے۔ تلنگانہ میں وہ کئی دیگر منصوبوں کی بھی شروعات کریں گے۔اس کے بعد وزیر اعظم گجرات کے جام نگر پہنچیں گے۔11 مئی کو صبح 10:15 بجے مودی سومناتھ مندر میں سومناتھ امرت مہوتسو میں شرکت کریں گے۔ بعد ازاں وہ وڈودرا جائیں گے، جہاں شام چھ بجے سردار دھام چھاترواس کا افتتاح کریں گے اور دونوں تقریبات میں عوام سے خطاب بھی کریں گے۔

ہندوستان کے 12 جیوترلنگوں میں شامل سومناتھ میں وزیر اعظم سومناتھ امرت مہوتسو میں شرکت کریں گے۔سومناتھ امرت مہوتسو، دوبارہ تعمیر شدہ مندر کے افتتاح کے 75 سال مکمل ہونے کے موقع پر منایا جا رہا ہے۔دریں اثنا، بھگونت مان نے کہا کہ انفورسمنٹ ڈائریکٹوریٹ (ای ڈی) کی اروڑا کے خلاف ’’نام نہاد‘‘ چھاپہ ماری جاری ہے۔انہوں نے کہا کہ ایک مہینے میں یہ دوسری بار اور ایک سال میں تیسری بار ہے کہ وہ آئے ہیں، لیکن پہلے بھی انہیں کچھ نہیں ملا تھا اور اب بھی کچھ نہیں ملے گا۔ وہ صرف یہ پیغام دینے آئے ہیں کہ بی جے پی میں شامل ہو جاؤ، ورنہ ان کے کاروبار بند کر دیے جائیں گے۔

مان نے الزام لگایا کہ بی جے پی کی قیادت والی مرکزی حکومت اپنے مخالفین میں اسی طرح خوف پیدا کرتی ہے۔ انہوں نے کہا کہ وہ دیگر ریاستوں میں ایسا کر سکتے ہیں، لیکن پنجاب میں ان کی یہ حکمت عملی کامیاب نہیں ہوگی۔