نئی دہلی
مرکزی وزیر شیوراج سنگھ چوہان نے پیر کو کہا کہ وزیر اعظم نریندر مودی کی جانب سے کفایت شعاری سے متعلق اقدامات اپنانے کی اپیل قومی مفاد میں ہے اور سبھی لوگوں کو اس پر عمل کرنا چاہیے۔
چوہان نے کہا کہ اس اپیل کا مقصد لوگوں کو ایندھن کی بچت کے لیے رہنمائی اور ترغیب دینا ہے، کیونکہ ایندھن ایک محدود وسیلہ ہے۔ وزیر اعظم مودی نے کہا تھا کہ مرکزی حکومت جنگ کے منفی اثرات سے عوام کو محفوظ رکھنے کے لیے کوششیں کر رہی ہے اور انہوں نے شہریوں سے چیلنجز کا مقابلہ کرنے اور ملک کی مدد کے لیے عملی اقدامات کرنے کی اپیل کی تھی۔
بھارتیہ جنتا پارٹی (بی جے پی) کی تلنگانہ یونٹ کی جانب سے اتوار کو حیدرآباد میں منعقدہ ایک ریلی سے خطاب کرتے ہوئے مودی نے پٹرول اور ڈیزل کا محتاط استعمال کرنے، شہروں میں میٹرو ریل خدمات استعمال کرنے، کار پولنگ اپنانے، الیکٹرک گاڑیوں کا زیادہ استعمال کرنے، پارسل بھیجنے کے لیے ریل خدمات کو ترجیح دینے اور گھر سے کام کرنے جیسے اقدامات تجویز کیے تھے۔
غیر ملکی زرمبادلہ کی بچت کی ضرورت پر زور دیتے ہوئے، مودی نے لوگوں سے ایک سال تک سونا نہ خریدنے اور غیر ملکی سفر ملتوی کرنے کی اپیل بھی کی تھی۔ چوہان نے کہا کہ ان کے مشورے وسیع قومی اور عوامی مفاد میں ہیں اور ہم سبھی کو ان پر عمل کرنا چاہیے۔ دور اندیش قیادت کا یہی مطلب ہوتا ہے کہ ہمیشہ قوم اور عوام کے بارے میں سوچا جائے اور ہر بحران میں ملک کی رہنمائی کی جائے۔
انہوں نے کہا کہ موجودہ صورتحال ہم سب کے سامنے ہے۔ ہمارے پاس تیل کے لامحدود ذخائر موجود نہیں ہیں جنہیں بغیر کسی فکر کے استعمال کیا جا سکے۔ ایک دور اندیش رہنما مستقبل کو مدنظر رکھتے ہوئے یہ یقینی بناتا ہے کہ نہ قوم اور نہ ہی عوام کو کسی مشکل کا سامنا کرنا پڑے۔ اسی لیے وہ ملک سے اپیل کرتا ہے، رہنمائی فراہم کرتا ہے اور لوگوں کو ترغیب دیتا ہے۔
کووڈ-19 وبا کی صورتحال کا حوالہ دیتے ہوئے چوہان نے کہا کہ وزیر اعظم کی دور اندیش قیادت کی وجہ سے ہی ملک اس بحران سے نکلنے میں کامیاب ہوا۔
انہوں نے کہا، ‘‘وزیر اعظم ایک ایسے قومی رہنما ہیں جو قوم کو اپنے دل میں بسائے رکھتے ہیں۔ وہ ایک دور اندیش رہنما ہیں۔ ہم نے یہ کووڈ-19 کے دوران بھی دیکھا۔ ان کی دور اندیش قیادت کی وجہ سے ہی ہمارا ملک اس بحران سے باہر آ سکا تھا۔
.webp "مودی کی اپیل قومی مفاد میں ہے: شیوراج چوہان")
