نئی دہلی
وزیرِ اعظم نریندر مودی نے ایندھن سے چلنے والی گاڑیوں کے استعمال میں کمی اور کفایت شعاری اپنانے کی اپیل کرنے کے چند دن بعد اپنے قافلے میں شامل گاڑیوں کی تعداد نمایاں طور پر کم کر دی ہے۔
سرکاری ذرائع کے مطابق وزیرِ اعظم کے حالیہ گھریلو دوروں کے دوران ان کے قافلے میں شامل گاڑیوں کی تعداد گھٹا دی گئی ہے۔تاہم، اسپیشل پروٹیکشن گروپ (ایس پی جی) کے پروٹوکول کے مطابق ضروری سکیورٹی انتظامات برقرار رکھے گئے ہیں۔
ذرائع کے مطابق، حیدرآباد میں اتوار کے روز کفایت شعاری کے اقدامات سے متعلق وزیرِ اعظم کی تقریر کے فوراً بعد گجرات اور آسام میں ان کے قافلے میں شامل گاڑیوں کی تعداد کم کر دی گئی۔ذرائع نے یہ بھی بتایا کہ وزیرِ اعظم نے ہدایت دی ہے کہ جہاں ممکن ہو، بغیر نئی گاڑیاں خریدے ان کے قافلے میں الیکٹرک گاڑیاں شامل کی جائیں۔
مغربی ایشیا کے بحران کے درمیان وزیرِ اعظم نریندر مودی نے اتوار کے روز حیدرآباد میں ہندوستانی جنتا پارٹی (بی جے پی) کی تلنگانہ یونٹ کی جانب سے منعقدہ ایک ریلی سے خطاب کرتے ہوئے کفایت شعاری اپنانے پر زور دیا تھا۔
وزیرِ اعظم نے پٹرول اور ڈیزل کی کھپت کم کرنے، شہروں میں میٹرو ریل خدمات استعمال کرنے، کار پولنگ اپنانے، الیکٹرک گاڑیوں کے زیادہ استعمال، پارسل ڈھلائی کے لیے ریلوے خدمات اختیار کرنے اور ’ورک فرام ہوم‘ یعنی گھر سے کام کرنے کو فروغ دینے کی تجویز دی تھی۔
.webp "مودی نےاپنے قافلے میں گاڑیوں کی تعداد میں کمی کی")
