نئی دہلی
صدر دروپدی مرمو پانچ روزہ دورے پر جمعرات کو مدھیہ پردیش پہنچ گئیں۔ اس دورے کے دوران وہ مختلف پروگراموں میں شرکت کریں گی، اومکاریشور میں بھگوان شیو کے جیوترلنگ کے درشن کریں گی اور چیتوں کی دوبارہ آبادکاری کے لیے مشہور کونو نیشنل پارک کا بھی دورہ کریں گی۔
اندور کے دیوی اہلیابائی ہولکر بین الاقوامی ہوائی اڈے پر گورنر منگو بھائی پٹیل اور وزیر اعلیٰ موہن یادو نے ان کا استقبال کیا۔اس موقع پر موہن یادو نے کہا کہ ہم ریاست میں صدر کا خیرمقدم کرتے ہیں۔ وہ اپنے دورے کے دوران مختلف پروگراموں میں شرکت کرنے کے ساتھ ساتھ چیتوں کی دوبارہ آبادکاری کے منصوبے کی پیش رفت کا جائزہ بھی لیں گی۔
حکام کے مطابق جمعرات کو صدر بیتول میں برہما کماری ادارے کے ایک پروگرام میں شرکت کریں گی۔حکام نے بتایا کہ دروپدی مرمو جمعرات کی شام اومکاریشور پہنچیں گی، جہاں وہ اومکاریشور اور مملیشور مندروں میں درشن اور آرتی میں شریک ہوں گی۔
انہوں نے مزید بتایا کہ صدر 19 جون کو عالمی سکل سیل ڈے کے موقع پر اومکاریشور میں منعقد ہونے والے ایک پروگرام میں مہمانِ خصوصی کے طور پر شرکت کریں گی۔حکام کے مطابق صدر 20 جون کی شام جبل پور پہنچیں گی۔ وہ 21 جون کو شہر میں عالمی یومِ یوگا کی تقریبات میں شرکت کرنے کے بعد رانی درگاوتی یونیورسٹی کے کانووکیشن (جلسۂ تقسیمِ اسناد) میں بھی شریک ہوں گی۔
حکام نے بتایا کہ صدر 22 جون کو کونو نیشنل پارک کا دورہ کریں گی اور اس کے بعد دہلی واپس روانہ ہو جائیں گی۔
_(1).webp "مدھیہ پردیش کے دورے پر پہنچیں صدر مرمو")
