پٹنہ: جن سوراج پارٹی کے بانی پرشانت کشور نے جمعہ (21 نومبر) کو الزام لگایا کہ ملک کی تاریخ میں پہلی بار بہار میں ووٹ خریدے گئے اور ایک کروڑ سے زیادہ خواتین کے کھاتوں میں 10-10 ہزار روپے جمع کرائے گئے۔ انہوں نے کہا: اگر میں غلط کہہ رہا ہوں تو بہار حکومت مجھے جیل بھیج دے۔

ریاست کے پاس فنڈز نہیں تھے، اس لیے ریاست کے ایمرجنسی فنڈ سے رقم لی گئی اور ورلڈ بینک کے گرانٹس کا بھی استعمال کیا گیا۔ انتخاب کے دوران NDA نے خواتین کو دو لاکھ روپے دینے کا وعدہ کیا تھا۔ ہم بہار کی خواتین کو یہ رقم ضرور دلائیں گے۔

مغربی چمپارن کے ضلع بتیا میں ایک دن کی بھوک ہڑتال ختم کرنے کے بعد پریس کانفرنس میں کشور نے اعلان کیا کہ 15 جنوری کے بعد جن سوراج کارکن ریاست کے تمام 1.18 لاکھ وارڈز میں جا کر لوگوں کو بتائیں گے کہ ان کے ووٹ کس طرح خریدے گئے۔ انہوں نے کہا کہ اسی دن سے ’بہار نو تعمیر عزم‘ مہم شروع ہوگی، جس میں وہ خود اگلے 15 سے 18 ماہ میں ریاست کے ہر گھر تک پہنچیں گے۔

پرشانت کشور نے کہا: اگلے پانچ سال تک میں اپنی آمدنی کا 90 فیصد پارٹی کو دوں گا۔ پچھلے 20 سالوں میں جو بھی جائداد حاصل کی ہے، دہلی میں ایک گھر چھوڑ کر، سب کچھ جن سوراج پارٹی کو دوں گا۔ انہوں نے ریاست کی عوام اور جن سوراج سے وابستہ افراد سے پارٹی کو 1,000 روپے چندہ دینے کی اپیل کی اور کہا: میں کسی ایسے شخص سے نہیں ملوں گا جو پارٹی کو 1,000 روپے کا چندہ نہیں دے گا۔

نتیش کمار کابینہ پر حملہ کرتے ہوئے کشور نے کہا: یہ بہار کی عوام کے منہ پر طمانچہ ہے، زخم پر نمک چھڑکنے کے مترادف ہے۔ کچھ لوگوں کو صرف اس لیے وزیر بنایا گیا کیونکہ ان کے والد سیاست میں ہیں۔ بدعنوان اور مجرمانہ پس منظر والے لوگوں کو بھی شامل کیا گیا۔

انہوں نے الزام لگایا کہ وزیراعظم نریندر مودی، مرکزی وزیر امت شاہ اور وزیراعلیٰ نتیش کمار اب بہار کی فکر نہیں کرتے کیونکہ انتخاب میں ووٹ خرید لیے گئے اور اب انہیں عوام کی پرواہ نہیں ہے۔ کشور نے کہا کہ ان کی سیاست مہاتما گاندھی کے صبر اور استقامت کے نظریے پر مبنی ہے۔ انہوں نے کہا:ہم حکومت بدل کر رہیں گے۔ بھارتیہ جنتا پارٹی (بی جے پی) نے ہمارا حوصلہ توڑنے کی کوشش کی، لیکن ہم پیچھے نہیں ہٹیں گے۔